November ni 9, Zirtawpni tlai Mc Dowell's No 1 Soda Mizoram Premier League (MPL) Season 7 Round 13 match hmasa ber I League Club Aizawl FC leh Mizoram Police FC inkhelah Aizawl FC chuan Isak Vanlalruatfela leh Khawpuimawia goal hmangin 2-1 in Mizoram Police FC an hneh. He inkhelah hian Aizawl FC winger Rochharzela chu Man of the match-ah thlan a ni.

Team pahnih te hi round 3-ah in hmachhawn tawhin Aizawl FC hian 3-1 in an hneh tawh a, an intawn vawihnihnaah pawh Aizawl FC bawk chungnung zawkah an tang. Aizawl FC hian semifinal an lut chiang tawh a, point 25 neiin pahnihna an ni meka ni. Mizoram Police hian point 18 neiin pathumna an ni mek a, match khat khelh hmabak an la nei a, semifinal khel turin chak ngei ngei an ngai tawh.

02:30 PM Aizawl FC 2-1Mizoram Police FC

(Isak Vanlalruatfela 45+1', Lalkhawpuimawia 83') (Malsawmfela 51')

MoM: Rochharzela, Aizawl FC

Goal lut te hi first half leh second half-a lut an ni a, first half-ah Aizawl FC tan Isak Vanlalruatfela chuan goal khat a khung a, Second half-ah Khawpuimawia chuang goal khat a khung bawk. Mizoram Police FC tan Malsawmfela chuan goal khat a khung ve bawk.

Inkhel tan a ni a, team pahnih te innawr tawn zak zakin goal hlauhawm erawh an nei lo ve ve a, first half huntawp dawn injury time-ah Aizawl FC chuan an hun tha neih hmang tangkaiin keeper Awmpuia ball vawrh luh chu Isak Vanlalruatfela chuan box-ah lalutin mawi takin a khung a, Aizawl FC chuan sikhat fai a hmahruaiin chawlhlawk an hmang zui ta a ni.

Second half tan a tang a minute 6 aral hmain Mizoram Police chuan an hun tha neih hmang tangkaiin Lalfakzuala corner pet tha zet chu box chhunga awm Sawmfela chuan mawi tak a tauh lutin an siphurh an sut.

Aizawl FC chuan nawr let nghalin F. Lalremsanga leh Lalrinchhana Tochhawng chuan an hun tha neih an hloh a, Mizoram Police pawhin goal thun belhna hun nei ve bawkin bench a tang a lut Lalsangbera chuan Aizawl FC keeper Awmpuia chiah a hmachhawn hnuah Awmpuia chuan a dan sak.

Goal luh belh lo in 1-1 a inhneh tawkin khelmual an chhuah san dawn emaw tih hnu huntawp nan minute 7 ala awmin mual dinglam sir a tang a, Rochharzela ball bawrh luh tha zet chu box chhunga awm Khawpuimawia chuan tauh lutin an goal hnihna a khung a, Mozoram Police chuan an siphurh sut turin hunin a daih tawh lo. Aizawl FC chuan 2-1 in hnehna an chang zui ta a ni.

(adsbygoogle = window.adsbygoogle || []).push({});