​Aizawl FC-in Mizoram Police FC an hneh

22nd September 2018, 04:09AM

Mc Dowell's No 1 Soda Mizoram Premier League Season 7 Round 3 match hnuhnung ber September ni 21, Zirtawpni zan Mizoram Police FC leh I League club Aizawl FC inkhelah Aizawl FC chuan 3-1 in Mizoram Police FC an hneh. He inkhelah hian Aizawl FC midfielder Paul Ramfangzauva chu Man of the match-ah thlan a ni.

Goal lut te hi first half leh second half-a lut an ni a, Aizawl FC tan Alfred Kemah Jaryan chuan goal hnih khungin Lalrinfela chuan goal khat a khung ve bawk. Mizoram Police FC tan Lalramtharmawia chuan goal khat a khung ve bawk.

Aizawl FC hian Electric Veng FC an hneh loh hnuah Chanmari FC an draw-a, Mizoram Police FC hnehin khelh tawhah point 4 an nei tawh a, Mizoram Police FC hian Bethlehem Vengthlang FC an hneh hnuah Electric Veng FC an hneh lo a, Aizawl FC hneh lo leh in khelh tawhah point 3 an nei tawh a ni.

07:00 PM Mizoram Police FC 1-3 Aizawl FC

(Lalramtharmawia 59') (Alfred Kemah Jaryan 9', 52', Lalrinfela 85')

MoM: Paul Ramfangzauva, Aizawl FC

Inkhel tan a ni a, Aizawl FC chuan inkhel thunun nghalin minute 9-ah Manipur defender Govin Sigh ball vawrh luh tha zet chu box chhunga awm Liberian midfielder Alfred Kemah Jaryan chuan mawi taka tauh lutin an hmahruaina a khung. Mizoram Police FC pawhin goal thunna hun tha nei ve bawk mahse forward Fakzuala goal shot tha zet chu Aizawl FC keeper Gurpreet Sigh Chabmal chuan a dan sak.

Aizawl FC chuan nawr chhunzawmin Khawpuimawia leh Alfred Kemah Jaryan goal shot tha zet chu Mizoram Police FC keeper Tanpuia chuan a dan sak ve bawk. Goal luh belh lo in Aizawl FC chuan 1-0 a hmahruaiin chawlh lawk an hmang.

Second half-ah goal hnih a luh belh a, Aizawl FC chuan inkhel thunun chhunzawmin minute 52-ah mual dinglam sir atang a, Khawpuimawia ball pek fing tak chu box chhunga awm Alfred Kemah Jaryan chuan goal-ah chantirin an goal hnihna a thun zui leh ta a ni.

Mizoram Police FC an beidawng lo. Goal thun ngei tumin an nawr let a, box pawn atang a, F. Lalrinpuia (Valpuia) goal shot tha zet chu Aizawl FC keeper Gurpreet Sigh Chabmal chuan a dan sak a, minute 59-ah Fakzula'n box chhunga ball a lak luh chu Aizawl FC defender Govin Sigh chuan tlawh thluin Mizoram Police FC chuan penalty an hlawh chhuak a, he penalty hi Lalramtharmawia chuan goal-ah chantirin an goal khatna a khung.

Aizawl FC chuan nawr letin Alfred leh Khawpuimawia chuan goal thun belhna hun tha an neih chu goal-ah an chantir thei lo a, Mizoram Police FC pawhin goal an thun belh thei tawh lo. Huntawp dawnah Aizawl FC winger Lalrinfela chuan goal a thun belh leh a, 3-1 in hnehna an chang ta a ni.

(adsbygoogle = window.adsbygoogle || []).push({});

Copyright © inkhel.com 2024. All rights reserved.