I-League khelh zawh takah Aizawl FC chuan an title an humhim zo ta lo a, beisei an pha lo hle a. Insiamtha turin hma an la chho tan mek a, player pahnih chu an lalut der tawh.

2016-17 I-League champion hian defender tha Lalrinchhana Tochhawng an lalut a, midfielder rawlthar Isak Vanlalruatfela pawh an lalut tel bawk.

Lalrinchhana Tochhawng hi tawn hriat ngah tawh tak a ni a, Mizoram captain ni lai mek niin, Mizoram Premier League velah chuan hming langsar berte zinga mi a ni a. Kum 23-a upa defender hian Mizoram club hrang hrangah a khel kual nual tawh a, 2013 khan Mumbai FC ah khelin I-League a lo khel tawh bawk a ni.

Aizawl FC hian Bengaluru FC Under-18 team atangin midfielder Isak Vanlalruatfela pawh an lalut a. AIFF Under-18 Youth League khel zo chiah, NECS Cup-a Bawngkawn LC team-a khel Isak hian season tharah chuan a vawi khatna atan I-League boruak a tem chho ve thei dawn a ni.