May ni 3, 2015 (Pathianni) khan I-League 2nd Division Round 12 khelh zawh a ni a, Aizawl FC chuan an khingpui an hneh laiin an nihrualpui Lonestar Kashmir FC chuan an khingpui an draw pui hlauh a, Aizawl FC hian point hnihin league hma an hruai leh ta a ni.

Bokakhat Stadium-a thlai dar 3 inkhelah Aizawl FC chuan hun tawp dawn lamah minute thum chhungin goal hnih an khung a. Alfred Kemah Jaryan chuan 74th mins-ah Aizawl FC goal hmahruai khungin, 76th mins-ah Brandon Vanlalremdika chuan Aizawl FC goal hnihna a khung ve leh a, si hnih faiin Aizawl FC hian Kenkre Sports lakah hnehna an chang ta a ni.

PTC Stadium Dergaon-ah Lonestar Kashmir FC an him hram a, first half minute 35-a Sumit Sarkar goal khung chu hun tawp dawn minute 73 naah Nurain Kareem chuan Lonestar tan a rul a, hun tawp dawnah na takin Lonestar hian an nawr, mahse goal dang an khung thei ta lo a ni.

Chamari FC erawhin an khingpui Hindustan FC 2-1 in an hneh lo hlauh a. Chanmari FC hian Joel Sunday hmangin first half minute 21-ah goal hmahruai khung mahse Sonu Beniwal chuan Hindustan tan a rul a, hun tawp dawn minute 2 la awmin ram Sanyasi chuan Hindustan FC tan chakna goal a khung ta a ni. Chanmari FC hian he an match hi an Senior Advisor car accident-a boral ta Pu Lalzamliana Sailo tan a hlan a ni.

Round 13 hi May ni 6, 2015 hian khelh a ni dawn a. Chanmari FC leh Aizawl FC te an inhmachhawn ang. Round hnuhnung ber Round 14-ah Aizawl FC chuan Mohammedan Sporting an hmachhawn anga, Chanmari FC chuan Lonestar Kashmir FC an hmachhawn dawn a ni.

Round 14-a Aizawl FC leh Chanmari FC te inkhel tur hian ngaihven a hlawh nghal hle a. An inkhelh hmasak zawk Round 7-ah khan Chanmari FC chuan 3-2 in hnehna an chang a. Tunah erawh an chak ve ve chuan chance chhete chu la nei mahse midang results-ah nasa takin an innghat dawn a, hei vang hian chance an nei chau hle.

Chanmari FC hian Aizawl FC duhsakin chance an pek mai mi tam tak chuan an beisei a ni maithei, mahse derby match a ni dawn a, derby match-ah induhsak a theih dawn loh. Chanmari FC hian an hlahthlem ngawt dawn lo chiang hle. Tin, Mizoram atanga I-League khel hmasa ber record neih hi club tan thil hlu a ni dawn, Mizo kan nih avangin Football-ah inhlahthlem chi a ni ringawt lova, chuvang chuan match hmuhnawm tak a ni ngei dawn e. Round 13 Chanmari FC vs Aizawl FC hi Golaghat Stadium-ah dar 3:00 PM-ah an khel dawn a ni.

(adsbygoogle = window.adsbygoogle || []).push({});