Stanley Rozario chuan hun awl an neih loh zia sawiin, Aizawl FC chuan khelh tur an neih chhoh deuh zut dawn avangin a tan pawh a buaithlak theih thu a sawi.

Aizawl FC chuan November 30 ah hian I-League an khel tan dawn a, Mohun Bagan chu an hmachhawn ang a. Hei bakah hian Mizoram Premier League khelh a ngai chho ve reng dawn a, an che fuh zel a nih chuan December 14 ah hian MPL final pawh khelh a ngai dawn a ni.

Head coach Stanley Rozario chuan, “Ka tan hian a buaithlak ve thei dawn a, khelh tur kan ngah chho dawn hle a. Tun hnaiah ni 15 chhungin match 5 emaw, match 6 emaw khelh a ngai dawn a. A buaithlakna ber pakhat chu inelna chi hrang pahnihah kan tel a, hmun hrang hranga khelh kual a ngai tur hi a ni a. Kan naute hi an inhliam loh a pawimawh hle dawn a, an chau chhe palh ang tih pawh a hlauhawm hle,” a ti.

“Hetiang taka hun awl an neih loh chhoh chuan an taksain a tuar ve thei a, rilru lamah pawh nghawng a nei ve thei bawk a. Result tha tak an neih theih zel a pawimawh dawn a, chuti a nih loh chuan an hnual ve thei a. Kei leh ka naute tan chona hautak deuh a ni dawn a, tha taka tih ngei chu kan tum dawn a. Kan tana chanchin lawmawm ve thei deuh chu club lian Mohun Bagan nen inkhel dawn mah ila, kan khelmuala che tla tur kan ni a, tlem chuan a ziaawm ve deuh,” a ti bawk.

Mizoram Football Association buatsaih MFA Cup a tel loh an thlang a, pre-season inbuatsaihnaah nasa zawka rilru pek an thlang a. August thlaa Independence Day Celebration Football Tournament-ah khan semi final-ah Aizawl FC chuan penalty shootout-ah FC Venghnuai an hneh lo a ni.

MPL khelh mekah Aizawl FC chuan game 10 khelhah goal 3 chiah an la chhuah a, vawi 8 chu an goal an venghim thei a. An game 11 khelhnaah first half chhungin 5-1 zetin hma an hruai a, Mizoram Police lakah 5-6 in an tlawm leh a ni.

Aizawl FC chuan ram dang player pahnih - Liberian midfielder Alfred Kemah Jaryan leh Uganda defender Juuko Richard Kassaga te an nei a, a hnuah Nigerian defender Eze Kingsley Obumneme chu an la leh bawk a ni.