08 Nov 2018 10:21

inkhel

​Aizawl FC-in Electric Veng FC an hneh

November ni 8, Ningani zan Mc Dowell's No 1 Soda Mizoram Premier League (MPL) Season 7 Round 12 match vawi hnihna I League club Aizawl FC leh Electric Veng FC inkhelah Aizawl FC chuan sihnih faiin Electric Veng FC an hneh a, point thum an hlawh chhuak.

Goal lut te hi second half-a lut ve ve an ni a, Aizawl FC tan K. Lalhmangaihkima leh F. Lalremsanga khung a ni. He inkhelah hian Aizawl FC forward F. Lalremsanga chu Man of the match-ah thlan zui a ni bawk. 

Team pahnih te hi round 1-ah inhmachhawn tawhin Electric Veng FC hian 2-0 in anhneh a, an intawn vawi hnihnaah erawh Aizawl FC an chungnung zawk a ni. Aizawl FC hian I League khelh mekah Neroca FC an hmachhawn zo chiah a, coach Gift Raikhan chuan player siksawi nual mahse, hnehna changin point 22 an nei a, pahnihna hauh mekin semifinal khel turin an din hmun an sawhnghet zel.

Electric Veng FC hian an match hnuhnung berah Isaak Vanlalpeka, Vanlalhmangaiha leh C. Lalnunmawia ten red card an hmuh avangin an khel thei lo a, a zawnin match nga an chak tawh lo. Point 17 neiin a sang pali zingah tel mahse, semifinal khelh an duh chuan an match khelh hmabakah chak an mamawh.

07:00 PM Aizawl FC 2-0 Electric Veng FC

(K. Lalhmangaihkima 56', F. Lalremsanga 87')

MoM: F.Lalremsanga, Aizawl FC

First half-ah Electric Veng FC chuan nawr zawk mahse Aizawl FC chuan goal thunna hun tha an nei hmasa zawk a, box pawn chiah a tang a Rochharzela shot chu a goal dawn nia alan laiin goal kham a per.

Electric Veng FC chuan nawr letin Vanlalremsanga chuan Aizawl FC keeper Awmpuia chiah a hmachhawn hnuah Awmpuia chuan a dan sak a, box chhung chiah a tang a Chhunga Hmar shot chu goal sirah chiah a kal bawk. First half huntawp dawnah box chhung a tang a David Lalchhuanawma shot chu goal sirah chiah a kal a, goal lut awmlo in hun chanve an hmang zo ta a ni.

Second half tan a tang a minute 56-ah Aizawl FC tan K. Lalhmangaihkima chuan box pawn veilam sir atangin an hmahruaina goal mawi takin a khung. Aizawl FC chuan nawr chhunzawmin goal thun belhna hun tha an nei zui a, bench a tang a lut Jonathan Lalrawngbawla chuan Electric Veng FC keeper Nunga Hnamte chiah a hmachhawn hnuah Nunga Hnamte chuan a dan sak.

Aizawl FC chuan inkhel thunun chhunzawm mahse, goal an khung thei tawh bik lo a, Electric Veng FC tan R. Lalthanmawia leh Vanlalremsanga chuan an siphurh sutna hun tha an hloh bawk.

Aizawl FC chuan sikhat faiin hnehna an chang tawh dawn emaw tih hnu huntawp dawn minute 3 ala awmin F. Lalremsanga'n ball tha a hmuh chu box-ah la lutin mawi takin an goal hnihna a khung. Hun atawp zui nghal a, Aizawl FC chuan 2-0 in hnehna an chang ta a ni.

(adsbygoogle = window.adsbygoogle || []).push({});