Aizawl FC chuan Rajiv Gandhi Stadium-ah Chennai City an lo mikhual a, Spanish striker Sandro Rodriguez goal hnih hmangin mikhual team hi an chak.

Tuns season-ah Aizawl FC chiah hi chak hmel la hmu lo awm chhun an ni a, game li khelh tawhah point 2 chu an hmu tawh a. Shillong Lajong leh Minerva Punjab te chu an hneh lo a, Mohun Bagan nen 2-2 in an inhnehtawk a, NEROCA FC nen goal inpe loin an inhnehtawk bawk a, point 2 hi an hlawh chhuak ve thei a ni.

(adsbygoogle = window.adsbygoogle || []).push({});

Game 4 khelha point 10 hmu thei Chennai City hi an che tha chho rih hle a, an hmaa ding zinga la tlawm lo awm chhun chu Churchill Brothers an ni a, 2-2 in an inhnehtawk a. An match hnuhnung berah East Bengal chu an hneh a, Kolkata club lian ai hian point 4 a sangin a pumpuiah hma an hruai mek a ni.

Aizawl FC: Lalawmpuia, Govin Moirangthem, Paul Ramfangzauva, Zikahi Dodoz, Albert Zohmingmawia, Alfred Jaryan, Lalrinfela, Lalramhmunmawia, Ghanefo Kromah, Hmingthanmawia, Vanlalduatsanga

Chennai City: Kabir T, Roberto E, Thangalakath, Sandro R, Edwin Vanspaul, Alexander Jesuraj, Charles Lourdusamy, Gaurav Bora, Nestor Jesus G, Ajithkumar Kamaraj, Ameerudeen

Gift Raikhan chuan Aizawl tlar hmaah Kromah chu bul a tantir a, Alfred Jaryan leh Leonce Dodoz te chu midfield lama an puipa an ni bawk a. Chennai City chuan midield laiah Nestor Gordillo an dintir a, a sir lamah Edwin Vanspaul leh Alexander Jesuraj te an dah bawk a ni.

Inkhelh an tan a, rin aiin an innawr na lutuk lo hle a, Aizawl FC chuan corner an hlawh nual a, mahse eng vakah a chantir lem lo thung.

Minute 18 an khel tling tihin Sandro Rodriguez chuan Aizawl goal lamah a pet a, mahse goal zawnah a kal ta lo chiah a. Team pahnihte hi an innawr chhunzawm deuh ngar ngar a, mahse khawi lam mah hian goal erawh an thun thei mai lo a. Half time thlengin goal inpe loin an inhnehtawk a ni.

Second half an khel leh a, tan phat atangin boruak pawh a danglam ta hle a. Minute 4 chauh an khel hman tihin goal a lut nghal der mai.

Chennai City chuan free kick an hlawh a, Sandro Rodriguez chu free kick pet tur hian a pen chhuak a. Spaniard hian Aizawl FC goal chunglam sir veilamah chuan mawi deuh maiin a pet lut a, Chennai chu 1-0 in hma a hruaipui a.

Aizawl FC chuan mual neitu zawk an nih hriain an si phurh sut ngei tumin hma an la chho a, mahse chuti maia awlsam erawh a ni lo a. Lalkhawpuimawia chuan minute 70-ah goal a thun teuh hle a, mahse a ball tauh chu crossbar chungah a kal hlauh a, kha ai khan ball kha kal hniam ta se Aizawl FC si phurh chu a sut thei tur ania.

Minute 72-ah Isak Vanlalruatfela chuan through ball a hmuh chu a la a, Zikahi Dodoz chu a pe phei a. Dodoz hian Chennai goal lamah ball chu a pet a, mahse Kabir Thoufiq chuan a lo dang a, heta ball kal zel hi Kromah chuan lo thunin Aizawl FC si phurh chu a sut a ni.

Mual neitu lam lawmna hian rei a daih lo hle a, goal luh atanga minute 5 vel chauh a kal leh hman tihin mikhual team chuan goal an thun ve leh nghal zat a, a vawi hnihna atan hma an hruai leh a.

Alexander Jesuraj thawhrah sengin mikhual lampang hian goal an thun a, Jesuraj hian dinglam sirah ball a tlanpui a, Aizawl goal lamah chuan ball chu a vawrh phei a, hei hi Chennai goal hmasa thuntu Sandro bawk chuan a lo tauh lut a, tun season chhunga I-League goal 3 a thunna hmangin Chennai chu 2-1 in hma a hruaipui leh a ni.

(adsbygoogle = window.adsbygoogle || []).push({});

Hemi hnu hian goal dang an thun belh tawh lo a, Chennai City chu 2-1 in an chak a, tun hnai game 5 chhungin vawi 4 chu an chak ta a. I-League ah point 7 in hma an hruai ta a, Aizawl FC erawh a mawngphahah an la awm chhunzawm ta zel a ni.