16 Nov 2019 10:09

inkhel

​Aizawl FC Chhingzo an awm lo

Mizoram Premier League (MPL) Season 8 khelh mekah November ni 16, Inrinni zan round 12 match hnuhnung ber hmahruaitu Ileague Club Aizawl FC leh parukna FC Venghnuai inkhelah Aizawl FC chuan 5-1 a FC Venghnuai hnehin point 3 an hlawh chhuak a, semifinal an lut chiang tawh. He inkhelah hian Aizawl FC midfielder Paul Ramfangzauva chu Man of the match-ah thlan a ni.

Team pahnihte hi Kolasib khelmualah intawngtawhin Aizawl FC hian 3-0 in anhneh a, an intawn vawihnihnaah pawh Aizawl FC bawk chungnung zawk an tang. Aizawl FC hian point 28 neiin hmahruitu an nih chhunzawm bakah semifinal an lut chiang tawh a, FC Venghnuai hian point 11 neiin paruk an ni mek a, semifinal lut turin beisei a bo tawh hle. 

Aizawl FC tan first half-ah Lalhriatrenga, Rochharzela leh F Lalremsanga te chuan goal khat theuh an khung a, second half-ah Aizawl FC tan bawk Isak Vanlalruatfela chuan goal khat khungin Lalruatsanga chuan an lamah ati lut a, FC Venghnuai tan Thangzawmsanga chuan goal khat a khung ve bawk.

07:00 PM Aizawl FC 5-1 FC Venghnuai

(Lalhriatrenga 20', Rochharzela 27', (P) F Lalremsanga 45', Isak Vanlalruatfela 60', Lalruatsanga 83'(OG) (Thangzawmsanga 60')

MoM: Paul Ramfangzauva, Aizawl FC

First goal thum a lut a, Aizawl FC chungnung zawkah tangin minute 20-ah Defender Lalhriatrenga (Achia) chuan freekick atangin goal hmahruai a khung. Aizawl FC chuan nawr chhunzawmin minute 27-ah penalty anhlawh chhuak a, he penalty hi midfielder Rochharzela chuan goal-ah chantirin an goal hnihna a khung zui bawk.

First half huntawp dawn injury time-ah Aizawl FC chuan an hun tha neih hmang tangkaiin mual dinglam sir atanga state pawn player Alfred Kemah Jaryan ball pek tha zet chu forward Lalremsanga chuan goal-ah chantirin an goal thumna khungin Aizawl FC chuan 3-0 a hmahruaiin chawlhlawk an hmang zui ta a ni.

Second half-ah pawh Aizawl FC bawk chungnung zawkah tangin minute 60-ah midfielder Isak Vanlalruatfela chuan an goal li na a khung leh a, FC Venghnuai pawhin an hun tha neih hmang tangkaiin zuiin midfielder Thangzawmsanga chuan an siphurh asut then.

FC Venghnuai forward Isak Vanlalpeka chuan goal thun belhna hun tha a hloh hnuah Lalhruaitluanga chuan Aizawl FC keeper Remruata chiah a hmachhawn hnuah Remruata'n a dan sak. Goal luh belh lo in Aizawl FC chuan 4-1 in hnehna an chang tawh dawn emaw tih hnu huntawp dawn minute 7 ala awmin bench atanga lut William Lalnunfela shot tha zet chu FC Venghnuai defender Lalruatsanga chuan an lamah ati lut hlauh a, Aizawl FC chuan 5-1 in hnehna an chang zui ta a ni.

November ni 22, Zirtawpni tlai dar 4:00-ah Aizawl FC hian Chanmari FC an hmachhawn ang a, zan dar 7:00-ah FC Venghnuai hian Electric Veng FC an hmachhawn ang.

(adsbygoogle = window.adsbygoogle || []).push({});