Mizoram Premier League (MPL) Season 8 khelh mekah November ni 18, Thawhtani zan khan Aizawl FC chuan I League an khelh dawn avangin round 14 an match hnuhnung ber Chhinga Veng FC nen an khel lailawk a, Aizawl FC chuan 1-0 a Chhinga Veng FC hnehin point 3 an hlawh chhuak.

Goal awm chhun hi second half-a lut a ni a, Aizawl FC tan state pawn player Alfred Kemah Jaryan chuan a khung a, Man of the match-ah thlan nghal a ni. Team pahnihte hi round 1-ah intawngtawhin 2-2 in an inhneh tawk a, an intawn vawihnihnaah erawh Aizawl FC an chungnung zawk. 

Aizawl FC hian point 30 neiin semifinal an lut chiang tawh a, hmahruaitu an nih chhunzawm bawk. Chhinga Veng FC hian point 21 neiin pathumna an ni mek a, match khat khelh hmabak anla nei a, semifinal khelh beiseina erawh anla nei.

07:00 PM Chhinga Veng FC 0-1 Aizawl FC

(Alfred Keimah Jaryan 69')

MoM: Alfred Keimah Jaryan, Aizawl FC

First half-ah goal lut a awm lo a, goal hlauhawm hmuh tur a tam lo bawk. Team pahnih te an innawr tawn zak zak hnuah Aizawl FC chuan goal thuna hun tha nei hmasa zawkin box chhungah forward William Lalnunfela shot tha zet chu Chhinga Veng Defender C. Muana chuan adang hman. Chhinga Veng pawhin goal thunna hun tha nei ve bawkin forward MC Malsawmzuala'n freekick atangin goal ban apet per ve bawk.

Second half-ah goal khat a lut a, goal hlauhawm erawh hmuh tur a tam lo. Chhinga Veng chuan goal thunna hun tha nei hmasa zawkin box pawn chiah atanga midfielder KC Larchhuakmawia shot tha zet chu agoal dawn nia alan laiin Aizawl FC keeper Arema'n a dang hman.

Aizawl FC chuan anhun tha neih hmang tangkaiin minute 69-ah Isak Vanlalruatfela thawhrah sengin Alfred Keimah Jaryan chuan an hmahruaina a khung. Chhinga Veng tan KC Larchhuakmawia'n minute 71-ah an siphurh sutna goal khung mahse, referee chuan offside a ham hman a, huntawp thlengin Chhinga Veng chuan an siphurh hi an sut thei ta lo a ni. 

November ni 21, Ninganiah League round hnuhnung ber tlai dar 4:00-ah Chhinga Veng FC hian Electric Veng FC an hmachhawn ang a, November ni 22, Zirtawpni tlai dar 4:00-ah Aizawl FC hian League round hnuhnung ber atan Chanmari FC an hmachhawn ang.

https://imgur.com/a/kIHQcdR link hi click rawh photo a awm 

(adsbygoogle = window.adsbygoogle || []).push({});