Mizoram Premier League (MPL) Season 8 khelh mekah Ileague Club Aizawl FC-in Kolasib khelmualah kai thar FC Venghnuai an hneh a, October ni 25, Zirtawpni tlai Round 7 Ar Lammualah Ramhlun North FC 3-2 in an hneh zui bawk.

First half-ah Ramhlun North chuan goal khatin hmahruai mahse, second half-ah Aizawl FC chuan 3-1 in an lehthal a, Aizawl FC tan F Lalremsanga, Rochharzela leh Joe Zoherliana chuan goal khat theuh an thun a, Ramhlun North tan Lalpekhlua Jongte chuan goal khat a khung ve bawk. He inkhelah hian Aizawl FC midfielder Rochharzela chu Man of the match-ah thlan a ni. 

Aizawl FC hian khelh tawhah vawili hnehna chang tawhin vawithum draw an nei tawh a, Point 15 neiin hmahruitu an ni mek a ni. Ramhlun North FC hian khelh tawhah vawikhat chiah hnehna na changin point 3 an nei tawh a,  table-ah pasarihna an ni mek.

04: 00 PM Aizawl FC 3-1 Ramhlun North FC

(F Lalremsanga 51', Rochharzela 79', Joe Zoherliana 90+3') (Lalpekhlua Jongte 29')

MoM: Rochharzela, Aizawl FC

First half-ah Aizawl FC chungnung zawkah tangin goal thunna hun tha nei nual mahse goal erawh an khung thei lo. Forward F Lalremsanga chuan vawihnih a hun tha a hloh a, box pawn chiah atanga midfielder Isak Vanlalruatfela shot chu Ramhlun North FC keeper Eddie Zorammawia chuan a dan sak hnuah box chhung chiah atanga Paul Ramfangzauva shot tha zet chu a goal dawn nia alan laiin Eddie Zorammawia chuan a dan sak bawk.

Ramhlun North FC chuan nawr letin anhun tha neih an hmang tangkai hmasa zawk. Minute 29-ah Aizawl FC defender Juuko Richard Kassaga tih sual nangchinin midfielder Lalpekhlua Jongte chuan an hmahruaina goal a khung a, goal dang luh belh lo in Ramhlun North FC chuan 1-0 a hmahruaiin hun chanve an hmang zo ta a ni.

Second half tan a ni a, minute 6 aral hmain Aizawl FC tan mual dinglam sir atanga midfielder Isak Vanlalruatfela ball vawrh luh tha zet chu box chhunga awm forward F Lalremsanga chuan tauh lutin an siphurh a rul.

Aizawl FC chuan nawr chhunzawmin goal thun belhna hun tha an nei zui nual a, Isak Vanlalruatfela shot tha zet chu Ramhlun North defender Lalramchhuana chuan a dang hmang a, midfielder Alfred Keimah Jaryan chuan a hun tha a hloh zui a, Isak Vanlalruatfela corner pet tha zet defender Juuko Richard Kassaga tauh chu a goal dawn nia alan laiin Ramhlun North FC keeper Eddie Zorammawia chuan adan sak.

Aizawl FC tan minite 79-ah midfielder Rochharzela chuan an goal hnihna an khung a, he goal hi box chhungah Ramhlun North Defender te paltlangin a thun a ni. Huntawp dawn added time-ah Aizawl FC tan Joe Zoherliana chuan an chak nem nghehna goal khung zuiin 3-1 in hnehna an chang ta a ni.

October ni 29, Thawhlehni zan dar 7:00-ah Ramhlun North FC hian Chawnpui FC an hmachhawn ang a, October ni 30, Nilaini tlai dar 4:00-ah Aizawl FC hian Electric FC an hmachhawn ang.

(adsbygoogle = window.adsbygoogle || []).push({});