AIMMAA Body Power India Open MMA Championship (international even), 8-10 January, 2016 chu hlawhtling taka neih zawh a ni a; JSJ FitPro Fight team te chuan an Gym (JSJ FitPro, Khatla), Mizoram state, Mizoram State MMA Association (MISMA) leh Mizoram police aiawhin hlawhtlinna an chang. JSJ FitPro Fight team-te chu hengte hi an ni:
1. Samuel Lalrozâma Hmar: Head referee leh referee tha ber chawimawina a dawng.
2. Zorinmawia, Luangmual (-57 kg): Professional fight-ah hnehna a chang.
3. Ngurlianzuala, Lily Veng (+93 kg): Amateur MMA (+18 years) - Gold.
4. Dominic Savio, Kulikawn (-57kg): Semi Contact MMA (-18 years) – Gold.
5. Lalchhuanawma, Luangmual (-66 kg): Semi contact (-18 years) – Bronze; Light contact (-18 years) – Gold.
6. Lalbiaksanga, Tuikual (-57 kg): Amateur MMA (+18 years)
7. Zothansanga, Electric Veng (-62 kg): Amateur MMA (+18 years)
A ni khatnaah hian Sport MMA (Light leh Semi contact) khelh a ni a. Hei hi kum 18 hnuai lam tan tih bik a ni. Him taka kum 18 la tling lo ten MMA an khel ve theihna tura dàn duan a ni. Chutah chuan Mizo pahnihin an khel ve. Dominic Savio, Kulikawn chuan a zâwna khel char charin Semi-Contact MMA-ah gold medal a la a, hotute beiseina a tisâng hle. Lalchhuanawma, Luangmual pawhin Semi contact-ah bronze leh Light contact-ah gold a la a ni. A ni hnihnaah hian kum 18 chung lam tan amateur MMA full contact khelh a ni a, hei hi tv vela kan hmuh pro țhin aia him tura rorum lo deuha dan siam a ni.
Lalbiak sanga chuan a khel hmasa ber a, Karnataka mi, boxer tha tak nen an intum a, first round-ah a mit chung leh biang a kak a, amaherawhchu round thum a khel tlang a, decision-in a chak zo ta lo a ni. Hotute fak a hlawh hle a, tuarchhel an ti hle. Zothansanga chuan a dawtah a khel ve a, first round hi Bahrain ram mi, world championship pawh lo khel tawh nen an intum a, an inhnehtawk viau a, amaherawhchu, Von Fluke Choke-in a tumpuipain a titlawm ta a ni. An pahnih hian vawi khat tournament liana an telna ve ve a ni a, fak an hlawh hle.
Tlai lamah Amateur bout bikah main event chu Heavy weight category-ah Ngurlianzuala Sailo, 3rd Battalion MAP leh Ruturaj Singh Bundheer [Uttrakhand] mi an intum a, mipui a hip hle, an lian dunin an rit dun bawk a, inkhawih vel a nah le a, mipui an hawhaw nasa. Ngura hi Muay Thai background a nih angin Muay thai petin a pet nasa a, an inkhawih na dun a, a tumpuipa hi tuarchhel tih a hlawh hle. Round thumnaah ground and pound vangin TKO-in Ngura hi a chak ta a ni.
He event-ah hian Samuel Lalrozama Hmar chu head referee a ni a, a ni hmasa berah rules briefing a pe a, kum 18 chung lam chu aman a conduct a, India head Coach Alan Fenandez chuan a chhawk zeuh zeuh a ni. Ani hian a awmna Bangalore ațangin student 7 a hruai bawk. Heng Mizo player te hi Ngura leh Zorina te hi Samuela chher bik an ni a, a bak hi chu MISMA leh JSJ FitPRo instructor Deng Thanchhunga chher te an ni.
He event ah hian pro bout 4 a awm dawn a, chung zingah chuan hmuhnawm ber tura beisei chu Samuela student te pahnihin inkhel kha a ni. Xico Zorinmawia chuan Muay Thai lama Bangalore-a Samuela zirtir tho, profrssional MMA record lo nei e tawh Biswa Dev a tum a. An inhnehtawk hle a, amaherawhchu, Zorina hi a khawih a na in a fuh chat zel vangin a tumpuipa a hliam na hle a, a khupa a tumpuipa hmai a tauhsak leh a pet vangin a hnar ruh a tlhtliahsak hial a ni. Round khat zawhah chuan doctor-in a titawp ta a, Zorina chuan hnehna a chang ta a ni. He event-ah hian mi 280 vel, state 15 leh ram hrang 7 ațangin an tel a ni.
AIMMAA hi India ram chhunga sorkar phalna neia MMA pawl lian leh hlun ber a ni a, UFC nena inzawm țha tak a ni bawk a, National commissioner Daniel Isaac huan kan naute tan chance tha tak a awm niin a sawi a, Mizote chungah beisiena sang tak a neih thu a sawi bawk a, MISMA, Mizoram sorkar leh Mizoram police chungah lawm thu a sawi bawk. Bahrain lal ram atang pawhin mi 11 lai an rawn tel ve a, an lal fapa chuan Samuela leh Hotu pali vel present a rawn thawn bakah interview an nei bawk a, an rama event lian lo awm turah referee ni turin an sawm nghal bawk.
He event a Mizo khelte hi JSJFitPro Gym, Khatla sponsor an ni a, JSJ FitPro neitu Dr. Joela leh Dr. Jerry te chungah Samuela chuan Mizo țhalaite aiawhin lawm thu a sawi a. MMA hi game thar a ni a, pawl dang anga sorkar fund nei ve lo a ni chungin khawvel pum huapa infiamna thang chak ber a nih chhoh mêk vangin Mizote hming khawvel huapa chher theihna a nih thu a sawi a, talent hmanga sum hai luhna kawng a nih thu a sawi bawk. Samuela hi India rama top level MMA coach a ni bawk a, theih tawk chhuah a hei aia sang thleng tura Mizo țhalaite, a bikin hmeichhiate, train a tum thu a sawi bawk. He event hi Asia rama fitness expo lian ber a ni a, ni khat luh man ₹1200 a ni a, Mumbai Mizo țhenkhatte chu Samuela hian pass a siamsak a, Vanlalchhanhima (Assistant Liasion officer, Govt. of Mizoram), Fela Ralte, Ruata leh Lovely te chuan final hian an va țawiawm ve a ni.
January ni 11 khan National meeting neih a ni bawk a, chutah chuan February-a Mizoram-a JSJ FitPro bultuma MMA league neih tura proposal awm chu pawmsak a ni a, MMA cage puitling pawh chah a nih thu report a ni. Tin, Mumbai Mizoram house-ah Mizo awm ten Mizoram team hi an lo lawmpui ve bawk.