All India Football Federation (AIFF) Technical director Scott O Donell chuan, Mizoramah bawk youth development bul tan a duh thu a sawi. Scott-a ho hian Mizoramah Grassroots football bul tan a ni a, India rama a hmasa ber niin India rama youth development project hmasa ber tur pawh hi Mizoramah bawk kalpui a duh. Thawhlehni zan khan Lammualah MPL final khelh hmain press conference hall-ah Scott hian MFA hruaitute leh District FA hruaitute hmaah Mizo naupangte football-a hma an sawn theih dan tur chungchangah seminar a nei a, Mizoram chu sulsutu ni turin a chah.
Australian pachal Scott chuan, "MFA kaihhruaina hnuaiah mumal takin mi nawlpui tan grassroots-in kalpui tawh a, hei hi state dang tan entawntlak a ni. Tunah chuan rahbi thar kan kai a tul a, India ramin football-a hmasawn tak tak a duh chuan tun aia kalphung mumal zawkin grassroots football hi kalpui a hun tawh. Mizoram atangin bul kan tan a ngai a, helai hmun atanga bul kan tan theih chuan state dang pawhin an chhunzawm thei ang," tiin a sawi.
AIFF technical director chuan a ruahmanna siam tawhte chu powerpoint presentation hmangin football hruaitu kalkhawmte chu a hrilhfiah a, youth development atan hian - school thuneitute, district football, state FA leh MPL club-te thawhhona tha chu a ngaih pawimawh ber a ni.
Scott hian Grassroots football kalpui a ni tawh a, MPL Under 18 a awm leh a, chumi inkar kum 12-17 inkarte tan a tam thei ang ber inelna buatsaih turin MFA leh DFA hruaitute a ngen. Scott hian Mizoram chu football-a hmasawn ber state zinga mi a nih thu a sawi a, India ram state dangte entawntlaka thawk chhunzawm zel turin a ngen a, AIFF atanga tanpuina pek theihte pek zel a intiam.
AIFF coaching department lama hotu ber ni bawk chuan Mizote chu inkhelh thiam hle mah se coaching lamah nasa tana tan lak a ngai tih a sawi a, "Tun thlengin A License coach in la nei lo hi in inhmeh lo hle a ni. Footballer tha tak tak in nei a, India rama state league chhuanawm bera chhal ngam in nei a, coach tam zawk leh license nei sang zawk in neih thuai a ngai. MFA hruaitute ka sawipui tawh a, district tinah emaw AIFF D License coaching course hi kum 2016 chhunga kalpui theih a tha ka ti hle a ni," a ti