AIFF-MFA Grassroots Leaders Course neih a ni

27th August 2019, 09:08PM

All India Football Federation leh Mizoram Football Association tangkawpin an buatsaih, ni thum awh tur Grassroots Leaders Course chu August ni 27, Thawhlehni khan Rajiv Gandhi Stadium Mualpuiah tan a ni. 

He course zirtir tur hian AIFF Grassroots Development atangin hun engemawchen Indian youth team lo kaihruai tawh thin Shailesh Karkare a rawn kal a, Mizo football coach 23 te chu naupangte kaihhruai dan a rawn zirtir a ni.

Shailesh Karkare chuan puitling te aiin naupangte football zirtir chu a har zawk tih sawiin, "Nuam ti tak leh hlim taka an khelh theih dan tur ngaihtuah a, anmahni zawlpuia zu indaha kaihhruai an ngai a ni," a ti a. "Football zirna hmanga khua leh tui tha ni zui tura an than chhoh chu kan ngai pawimawh a ni," a ti bawk.

India rama football club lian tak takten puitling (senior) team hlawhtlinna chauh ngaihtuah a, naupang lam hmasawnna an hlamchhiah thin chu India football thanmawh bawk pakhat a ni tih a sawi a, player tha sa lawr khawm ringawta club kalpui reng hian hmasawnna tak tak a thlen mawh hle tih chu a hmuh dan a ni tih a sawi. Shailesh Karkare chuan Mizoram bakah Meghalaya, Maharashtra (WIFA) leh Goa te chu Grassroots Development a ti tha ber ber te an nih mek thu a sawi.

Shailesh Karkare chuan Grassroots football ah hian naupang te chauh ni lo, football khel tir kum upa lam (veteran) te pawh an tel vek thu a sawi bawk.

Ni 3 awh Grassroots Leader Course hi zingkar atanga khawthim thlenga kalpui niin, theory class leh practical class urhsun takin an kalpui a, hengah te hian nungchang kaihhruai dan te leh midang hriatthiam dan te an inzirtir a ni. Ni hnuhnung berah Exam buatsaih a ni dawn a ni.

Copyright © inkhel.com 2024. All rights reserved.