Chennai City FC chuan I-League season tawp niah Minerva Punjab chu 3-1 in an hneh a, a vawi khatna atan title an la a. An champion atangin thla thum chu a ral leh tawh a, heti chung hian All India Football Federation (AIFF) chuan champion team hi an lawmman dawn tur pawisa an la pe lo.
All India Football Federation (AIFF) chuan I-League champion hnenah hian lawmman atan pawisa Rs. 1 crore hlan tur an ni a, season tawp atanga thla thum hnuah pawh Chennai City FC hnenah pawisa hi an la hlan ta chuang lo a ni.
Rohit Ramesh, Chennai City FC neitupa chuan, “Thla thum kaltaah khan I-League champion kan ni a, tun thlengin kan lawmman dawn tur pawisa fai hi kan la hmu lo a. AIFF hnenah pawh kar thum kaltaah khan lehkha kan thawn a, chanchin tharlam min hrilh turin kan ngen a, chuti chung pawhin min la chhang chuang lo a ni,” a ti.
2016-17 season-ah khan Chennai City FC chuan I-League an khel ve tan a. Tun season hman zawh takah khan beisei loh deuhin an che tha chho hle a, a tawpah chuan champion hial an ni thei ta a ni.
I-League title an lak avang hian Chennai City FC chu season thar atan AFC Champions League preliminary round khel thei turin an tling a. India aiawha Asia khawmualpui club ho inelnaa tel tur hian title an lak atanga thla thum a ral hnuah pawh pawisa an la dawng lo thung.
Anni club mai bakah Minerva Punjab FC leh Gokulam Kerala FC te pawhin an pawisa dawn tur chu an la dawng ta bik lo a. Heng club pahnihte hi Rs. 15 lakhs ve ve dawng tur an ni a, Gokulam Kerala FC hian floodlight charge an dawng tel dawn a, a enga mah hi an kutah a la thleng hlawm lo a ni.
Tun tum hi hetiang thil thlen hmasak ber a ni hran lo a, 2017-18 season I-League champion Minerva Punjab FC pawh khan title an lak hnuah pawisa an dawng vat bik lo a. Hun eng emaw chen an nghah hnuah pawh AIFF hian pawisa an la pek mai loh avanin Super Cup khelh loh an tum a, hetianga an tih hnuah chauh hian AIFF chuan pawisa chu an pe a ni.
2016-17 season-a Aizawl FC in I-League title an lak pawh khan lawmman pawisa fai hi an dawng har viau bawk a. An champion atanga thla li hnuah an pawisa dawn tur chu AIFF chuan an pe ve chauh bawk a ni.