All India Football Federation chuan e-Sports lamah bung thar a kai dawn ta a, FIFAe Nations Series 2021-ah India team tirh ve a tum thu a puang ta. 

EA Sports siam FIFA 21 game hi FIFA chuan a hnuaia member-te inelnan tournament lian a buatsaih thin a, hetah hian AIFF chuan India ram chhunga FIFA game khel thiam pahnih thlangchhuakin eNational Squad chu FIFAe Nations Series 2021 (FeNS21)-ah tirh ve a tum dawn ta a ni.

FeNS21 inbuatsaihna atan India ram chhungah tournament lian siam a ni dawn a, 'AIFF eFootball Challenge' tiin March ni 20 atanga April ni 4, 2021 chhunga neih tur a ni dawn a, PlayStation hmanga FIFA 21 khel thin India gamer tha zual 16 te chu he 'AIFF eFootball Challenge'-ah hian an inlan dawn a ni.

Qualification leh seeding atan February ni 25, 2021-a The FIFAe Global Series Rankings (West Asia Region) hman a ni anga, 'AIFF eFootball Challenge'-a finalist pahnihte chu India ram aiawha FIFAe Nations Series 2021 (FeNS21)-a inlan tur an ni dawn a ni. AIFF eFootball Challenge-a tel tumte tan March ni 1 atanga ni 10 chhungin inziahluh tur a ni ang.

FeNS21 qualifier hi stage hrang hrang khelh chhoh a ni anga, India ram chuan Middle East leh Africa server region hmangin an khel dawn a ni.

AIFF General Secretary Mr. Kushal Das chuan, "Bul tanna pawimawh leh fing tak a ni. He game hian India ramah Football a tilar ngei dawn a, ram chhungah fans tam tak a hip ngei dawn bawk a ni.

"Gaming hian khawvel pumah football fans a siamin a thlungnghet tha a, hrileng avangin khawvel pumah eSports a lar em em, heng game khawvela zuanluh hi football fans tan phurna nasa tak siamtu a ni dawn a ni," tiin a sawi.