All India Football Federation D Licence Course chu June ni 24, Thawhtanni khan Rajiv Gandhi Stadium-ah tan a ni a, June 29-ah an zo ang.

Mizoram district hrang hrang atangin coach 23 an kal khawm a, course Instructor chu Shakti Chauhan a ni a, ani hi Delhi Dynamos-a kum li chhung assistant coach lo ni tawh, Tata Football Academy coach hlui ni bawk a ni.

Hawnna inkhawma thusawitu MFA Finance Secretary Lalruatsanga Tochhawng chuan, "MFA-in AIFF nena tang kawpin AIFF D Licence Course hi a buatsaih zauh zauh a, coach tha tak tak an chhuak a, kan tangkaipui hle a ni. Chutihlaiin coach thenkhat, a degree chauh duh, a taka chhawr tur awm zui lo an awm thin hi a pawi a, nangni chu in awmna district leh khuaah active coach ni ngei ang che u," a ti.

Roberto Carlos-a hnuaia assistant coach ni tawh Shakti chuan Mizoram chu football-a state hmasawn ber zinga mi a nih rualin coach education lamah tan lâk an la ngai nia a hriat thu a sawi a, he course atang hian coach chhawr zui tlak tha tak tak an chhuah ngei a beisei thu a sawi.

Shakti hi Danny Lalduhawma, AFC A License coach chuan he course neih chhung hian a pui (assist) dawn a ni.

Tun tum D Licence Course-ah hian football player hlui langsar tak takte pawh an tel dawn a, mipa 22 leh hmeichhe pakhat an ni.

Coach education lama hmalakna dangah July thla chhung hian AIFF chuan Asian Football Confederation Level 1 Futsal Course chu Aizawlah a nghat dawn bawk a ni.