10 Jun 2015 07:12

Serchhip Chelsea

AIFF Academy mawina Mizo rawltharte.

All India Football Federation (AIFF) enkawl AIFF Elite Academy hi tun season Under-19 I League-a champion an ni a, an hlawhtlin theihna kawngah hian player tangkai tak tak pathum an awm a, chumite chu Daniel Lalhlimpuia, Lalramzauva Khiangte leh Malsawmzual-te an ni.

Under-19 I League khel tur hian qualifying round khelh a ni a, zone hrang hranga thendarh niin Elite Academy hi Goa zone-ah an awm a Salgaocar Under-19 team nen an zone atang hian final round an lut.

He intihsiaknaah hian Mizo club Chanmari FC pawhin final round lut a, Rest of India B Zone atangin a ni a Hindustan FC nen he zone atang hian final round lut pha an ni.

Zone hi paliah then a ni a, April thla khan Pune-ah final round hi khelh a ni.

FINAL ROUND KHEL TURA TLINGTE:

* Goa zone – AIFF Elite Academy & Salgaocar FC

* Kolkata zone – United SC & Mohun Bagan

* Maharashtra zone – Pune FC & DSK Shivajians

* Rest of India zone – Hindustan FC (Delhi) & Chanmari FC (Mizoram)

CHAMPION TEAM THLIRNA:

Tun tumah hian team hrang hranga Mizo player awmte kan tarlang tel dawn lo va, Mizo player kan sawilang anih pawhin Elite Academy-a awm Mizo player-te bik chauh kan sawilang ang.

Elite Academy hian final round-ah game 7 khelin goal 20 ngawt mai an khung a, goal 3 chiah an chhuah thung.

Game 7 an khel atang hian game rukah hnehna an chang a, game khatah an tumpuite an draw a tlawm an nei lo.

Team squad:

* Arshdeep Singh

* Shahbaaz Khan

* Kapil Boro

* Nishu Kumar

* Gursimrat Singh Gill

* Mohamed Shajid Dhot

* Suman Sarkar

* Robinson Singh

* Milan Basumatary

* Moinuddin Khan

* K Prasanth

* Daniel Lalhlimpuia

* Malsawmzuala

* Bidyananda Singh

* Sayak Barai

* Japis Singh

* Lalramzauva Khiangte

* Delbert Fernandes

* Rakesh Oram

* Kamalpreet Singh

* Swastik Mukherjee

* Amey Ganesh Ranawade

* Hayden Fernandes

* Sarthak Golui

CHAMPION KALKAWNG:

Final round hi April thla khan khelh a ni a, league kalphung a ni a vawikhat theuh an intum kual hnuin point hmu sangber an champion.

Elite Academy hian 20 khan final round-a an game hmasa ber chu Salgaocar FC nen an khel a, 2-1 in an chak nghal.

Final round-a an result dang:

* 22 April: DSK Shivajians 1-4 Elite Academy

* 24 April: Elite Academy 1-1 Pune FC

* 28 April: Elite Academy 2-0 Hindustan FC

* 30 April: Mohun Bagan 0-3 Elite Academy

* 4 May: Elite Academy 6-0 Chanmari FC

* 6 May: United SC 0-2 Elite Academy

Qualifying round nena belkhawm chuan Elite Academy hian game 14 an khel a, chawhrualin game tinah point 2.71 hmu ang zel an ni a, hnehloh an tawng lo va vawihnih an tumpuite an draw.

Qualifying round leh final round belhkhawmah tho hian goal li chiah an chhuah a, goal 44 lai an khung thung.

He team hian goal an chhuah hmasa ngai lo va, khualmual (away)-a an chak chian ber tum chuan 9-0 in an chak a Dempo SC rawltharte an sawp. Hei hi January ni 31 khan a ni a qualifying round a ni bawk.

An khelmuala an chak chian ber tum chuan 6-0 in Chanmari FC Under-19 team an sawp a, hei hi final round-ah a ni tawh thung.

Qualifying round-ah hian an game hmasa parukah hnehna an chang vek a, an chak tluang lai hi Salgaocar FC rawltharte'n an chelh ding a February ni 10 khan goal inpe lovin an in draw.

Final round-ah hian team tinin game 7 theuh an khel a, heta tang hian Elite Academy hian point 19 an hlawhchhuak thei a anmahni hnaih bertu Pune FC-in point 16 an hmu ve bawk.

Pathumnaah point 11 neiin Salgaocar FC an awm a, Mizo club Chanmari FC pawhin point 10 neiin palina dinhmun an hauh pha.

ELITE ACADEMY-A AWM MIZO PLAYER-TE SULHNU:

Serchhip Field Veng rawlthar Daniel Lalhlimpuia'n goal 5 a khung a, an club bikah hian top scorer a ni.

Malsawmzuala pawhin goal khat a khung bawk a, Lalramzauva Khiangte in goal a khung lo va mahse player pawimawh ni pha reng tho.

Mizo player-te hi May thla khan Mizoramah an lo haw zuai a, tunah chuan Goa lamah an kir leh tawh a ni.