Sergio Aguero chu Manchester City tana goal khung hnem ber a ni ta a, record a siamna inkhelah hian 4-2 in Napoli an hneh a Champions League knock-out stage an lut.
Stadio San Paolo-a inkhelah hian Manchester City tan Nicolas Otamendi, John Stones, Aguero leh Raheem Sterling-te'n goal an khung a, Napoli tan Lorenzo Insigne leh Jorginho-te'n goal an khung ve bawk.
Napoli 2-4 Manchester City
(Insigne 21', Jorginho 62' pen) (Otamendi 34', Stones 48', Aguero 69', Sterling 90'+2)
Napoli XI: Reina (GK); Hysaj, Koulibaly, Albiol, Ghoulam; Allan, Jorginho, Hamsík; Callejón, Mertens, Insigne.
Subs: Maggio, Zielinski, Chiriches, Sepe, Rog, Ounas, Diawara.
Manchester City XI: Ederson (GK); Danilo, Stones, Otamendi, Delph; Fernandinho, De Bruyne, Gundogan; Sane, Sterling; Aguero.
Subs: Bravo, Walker, Mangala, Bernardo Silva, David Silva, Jesus, Toure.
Team pahnihte an in ngam tawn nghal a goal khung hmasa zawk nih ngei pawh an tum tih a hriat nghal mai.
Napoli forward Dries Mertens a langsar a Belgian forward hi Manchester City defender John Stones-a'n a veng hneh lo lek lek țhin.
Mualneitu lam hian minute 20-naah goal an khung ta zawk a, Mertens nen mawi taka ball an inpek hnuin Lorenzo Insigne chuan goal a khung a City tlarhnung an che hman lo.
Si phur hma viau mahse City-in goal an khung ve thei tih lantir nan minute 34-naah an si phur an sut a, Otamendi chuan Gundogan ball vawrhluh a tauh goal a 1-1 a ni.
City an phur tulh tulh a goal an neihbleh lehnghal teuh hle. Otamendi ball thlawhluh ațangin Stones chuan Napoli goal chungkham a tauh per dawp a mualneitu lam an him hram.
Mikhual team City hian nawr zui zel ta zawk mahse goal an neihbelh thei bik lo va first half-ah goal khat ve ve inpe in an inhnehtawk.
Second half an țan fel deuh chiah tihah Leroy Sane ball vawrhluh chu Stones-a'n a tauh lut a khualmualah City-in hma an hruai.
Napoli lamin goal an khung hmasa thei a, a dang pawh khung leh an tum tih hriat nan Insigne chuan City goal chungkham a tihper a an si phur a rul zo lo.
Minute 62-naah City winger Sane a chesual a, an box chhungah Napoli defender Raul Albiol ti tluin penalty a chawi ve thung.
Albiol penalty hlawhchhuah hi Jorginho chuan goal-ah a chantir zui a inkhel boruak a nung țha tawh hle.
Jorginho pet goal ațanga minute sarih a liam tihah Aguero hun a thleng ve ta a, Argentine striker hian Sane ball pek hmang țangkaiin an hmahruaina goal a khung veleh a khualmualah City-in hma an hruai zui leh.
Argentine striker Aguero hian Manchester City tana goal khung hnem ber record a siam ta a, City tan hian game 264 a khel tawh a goal 178 a khung tawh.
Aguero-a'n record a siam hnu hian City bawkin an nawr chhunzawm a goal an khungbelh tawh dawn lo niin a lang hman tawh.
Hun pekbelhah Sterling chuan Kevin De Bruyne ball pek hmang țangkaiin an goal lina a khung a Napoli tan tih ngaihna a awm tawh lo.
Manchester City hian knock-out stage an lut fel ta a, an hnuai chiahah point 9 neiin Shakhtar Donetsk an awm ve thung.
Pathumnaah point thum neiin Napoli an awm a palinaah point la nei ve lo Feyenoord an awm mek bawk a ni.