​Aguero a ngaihtuahawm lohve : Pellegrini

12th February 2015, 10:02AM

Nizan khan Manchester City chuan 4-1 in Britania Stadium-ah Stoke City an hneh a, goal hnih khungtu Sergio Aguero chu second half-ah inhliam vanga lakchhuah a ni. Pellegrini chuan a striker chu a ngaihtuahawm loh thu a sawi.

Manchester City tan Aguero chuan goal hnih khungin, Milner leh Nasri te chuan goal khat ve ve an khung a. Stoke tan Crouch chuan goal khat a khung ve bawk a ni. Aguero hian nikum December ni 3 hnuah goal a khung leh hmasak ber a ni a. Britania Stadium-ah Pellegrini chuan hnehna a chang ve ta nge nge a.

Pellegrini chuan,"Aguero fit hi a pawimawh hle a, harsatna a neih avangin lakchhuah a ni a. Mahse thil hlauhthawnawm em em a ni hran lo. Ni 10 lai match kan khel dawn lo, February ni 21 hian Newcastle a hmachhawn hman ngei ka ring." tiin a sawi.

Manchester City chu league-ah pahnihna an ni chhunzawm zel a, khelh 25 atangin point 52 an nei a, hmahruaitu Chelsea chu point 7 in an la thlau mek a. Man City hi an hnuai chiaha awm Man Utd chuan point 5 in an phak lo mek. City hian an title hi hum ngei an la tum ruh hle a, Pellegrini chuan fit tak a season chawhnu lam a hmatawngte an awm theih chuan champion thei an la nih reng thu a sawi tel bawk a ni.

Copyright © inkhel.com 2024. All rights reserved.