Manchester City manager Pep Guardiola chuan striker Sergio Aguero chu a inhliam thu leh, an game khelh leh tur pahnihah chhawr theih a ni lo maithei tih a sawi.

Inrinni liamtaa City-in Bournemouth an hneh tum pawhin Aguero hi awl tir a lo ni tawh a, tha na a nei a, kumthar January thla thleng pawh inhliam thei dnhmunah a ding mek.

Guardiola chuan, “Zirtawpni khan daktawr-ten Sergio chu a inkhelh theih loh thu min hrilh. A khelh chuan kar li emaw kar nga ve a awl phah thei a, chuvang chuan tun thlaah game kan ngah bawk nen, kan chhawr ngam lo maithei,” a ti.

City hian tunkar thawhlehni hian Vicarage Road-ah Watford an hmachhawn dawn a, inrinniah Chelsea chu Stamford Bridge-ah an hmachhawn leh nghal dawn bawk. Heng game pawimawh pahnihah hian Guardiola chuan a striker Aguero chu a chhawr theih dawn em tih a la hriat loh thu sawiin, “Tunah chuan Aguero hi Watford leh Chelsea lakah a chhawr theih dawn em tih ka la chiang lo.

“A tlachawpa enthlak a ngai a, dartawrte nitin ka bia a, engkim min hrilh thin. Anni hian Aguero khelh theih leh khelh theih loh chu min hrilh leh dawn a, chutah thutlukna kan siam chauh ang,” a ti.

City striker dang Gabriel Jesus pawh hi tun season-ah a inhliam leh thin a, season hmasa a pha lo hle bawk. City hian striker dang an nei bik lem lova, Guardiola chuan a squad a siamrem deuh chu a ngai dawn niin a lang a ni.