India striker Jeje Lalpekhlua chuan youth team atanga senior team a lut chho player te chu an ziaawm duh zawk zel niin a sawi.

Jeje Lalpekhlua chuan age-group team vela tel hnua senior team zawm leh theih chu duhthusam a nih thu sawiin, hetiang a nih hi chuan player te chu an puitling duh lehzual niin a sawi a ni.

Kum 27-a upa Jeje chuan, “Keimah bikah chuan age-group vela tel tawh hnuah senior team-ah ka khel chho leh a, hei hian nasa takin min pui a. Puitlin kawngah a tangkai em em a, chu mai bakah age-group zar zoin international game lamah tawn hriat ka neih that phah bawk a ni,” a ti.

“International leh ram chhunga khelh chu a inan lohna a nasa em em a, tehkhin dun chi pawh niin ka hre lo a. Age-group vela tel ngai lo, senior team-a an koh tharte hi a tlangpuiin an tal buai deuh thin a, international football khel tur chuan insiamrem hi a harsa bik tlat a. Hei vang tak hian age-group vela lo khelh thin tangkaizia a lang chhuak thin a ni,” a ti bawk.

Hnahthial tlangval hi Gurpreet Singh Sandhu, Pritam Kotal, Pronay Halder leh Narayan Das te nen India aiawhin U-19, U-22 leh U-23 velah te an lo khel tawh hlawm a, 2010 Asian Games-ah pawh khan a tel tawh bawk a ni.

“Keini hian kan lo khelho rei ve tawh hle a, hei hian nasa takin tunah pawh min pui a. Kan khelh dan te kan inman tawh hle a, kan inpawh dan a thuk tawh riau a. Heng zawng zawng hi age-group vela kan khelh thin vang kha a ni a, a tangkai tih chu hai rual a ni lo a ni,” tiin Jeje chuan a sawi.