African player tha ber ni thei Liverpool player pathum

01st December 2018, 09:12PM

2018 African Player of the Year dawng thei tur an chhawp chhuak a, hetah hian Liverpool player pathum hming a lang a. Mohamed Salah bakah a khelhpui Naby Keita leh Sadio Mane te zinga tu emaw ber chu African Player of the Year ni thei dinhmunah an ding hlawm a ni.

Mohamed Salah chuan 2017 khan ram leh club tan a chet that em avangin he chawimawina hi a lo dawng tawh a, Egypt chu Africa Cup of Nations final a luhpui bakah 2018 FIFA World Cup khel thei turin a tlinpui thei a ni.

Kum 26-a upa Salah hi Guinea midfielder Naby Keita leh Senegal forward Sadio Mane te nen chawimawina dawng tur hian an intlar a. Anni bakah hian 2016 a he chawimawina lo dawng tawh Riyad Mahrez leh 2015 a lo dawng tawh Pierre-Emerick Aubameyang te hming pawh a tel a. Confederation of African Football (CAF) chuan chawimawina dawng thei tur hian hming 34 an chhawp chhuak phawt a ni.

Arsenal-a Pierre-Emerick Aubameyang khelhpui, Nigerian forward Alex Iwobi pawh chhawp chhuah zingah hian telin, Everton midfielder, Senegal star Idrissa Gueye leh Ivory Coast star Wilfried Zaha te hming pawh a tel bawk a ni.

Europe khawmualpuia khel thenkhat hming a lang hlawm a, Atletico Madrid player Thomas Partey, Juventus star Medhi Benatia, Ajax player Hakim Ziyech leh Porto midfielder Yacine Brahimi te hming pawh a tel a ni.

Copyright © inkhel.com 2024. All rights reserved.