14 Jan 2020 04:08

inkhel

Africa-a hausa berin Arsenal lei a tum

Aliko Dangote chuan 2021 ah Arsenal chu lei a duh tih sawiin, Africa-a pa hausa ber tia an sawi hian tuna a thil tih lai a zawh hunah Premier League club hi lei a tum thu a sawi.

Nigerian pa hausa Aliko Dangote hi Africa-a cement siam chhuaktu lian ber Dangote Cement neitupa niin, hei bakah hian company hrang hrangah share a nei teuh bawk a. Kum 62-a upa Dangote hausakna hi £8.5 billion vel zet niin an chhut.

Dangote hian 2020 kumah khan Arsenal lei a tum thu hi a lo sawi tawh a; amaherawhchu, tuialhthei thlitfimna hmun Dangote Refinery a buaipui avangin a duh angin a inpeih hman lo a, hei vang hian English club lei a tum hun chu a sawn hlat phah a ni.

Arsenal tantute chuan tuna club neitu Stan Kroenke chu an ngaithei lo tawh hle a, kum eng emaw zat chhung chu an duh lohna pawh an lantir chho tawh a. Denver Nuggets leh LA Rams neitua Stan Kroenke hi Emirates Stadium lamah a hmel hmuh tur a awm ngai lo hle a, hei hian club tantute thinrimna a tizual bawk a ni.

Club tantute chuan a neitu thar awm thei se an ti hle a, Aliko Dangote hian Arsenal a lei a nih chuan dinhmun pawh a danglam thei turah an ngai a ni.

“Arsenal hi engtikah emaw chuan lei ngei ka duh a. Tunah tak hi chuan project lian tham tak mai, £20 billion project kan nei mek a, hemi kan zawh fel hunah chuan club hi lei ka tum,” tiin Dangote chuan a sawi.

“Kan project neih laiah hian inpumpek ka duh rih a, kan zawh fel hunah khaw dang chu ka hawi ve thei tawh ang a. 2021 velah chuan Arsenal hi lei ka tum dawn a. Tunah chuan lei hi ka la tum dawn rih lo a, hna dang neih lai chuan a rem rih lo a. Ka hna neih lai ka zo fel ang a, kan company hi dinhmun sang zawkah ka dinpui phawt ang a, chumi hunah chuan ka lei chauh ang,” a ti bawk.

Tun season-ah Arsenal chu Premier League-ah 10-na an ni mek a. Manager an ban tak Unai Emery kaihhruaina hnuaiah an tlahniam nasa hle a, tun hnaiah Mikel Arteta an ruai a, hemi hnuah hi chuan tlemin an boruak pawh a inthlak danglam chho mek a ni.