Asia khawmualpuia football hmanga inelna lian AFC Cup ah India ram club eng emaw zat an tel ve ta a, champion an la awm hran lo a, final lut te chu an awm ve tawh a. He inelnaa India ram atanga club tel zinga che tha zual 5 han thlir kual ila.
2004 atanga AFC Cup khelh a nih atang khan East Bengal chu he inelnaa inlan ngun ber an ni mek a, tun thlengin vawi 8 chu an tel ve tawh a. Bengaluru FC chu vawi 4 tel ve tawhin, Dempo Sports Club pawh vawi 5 chu an tel ve tawh a ni.
Bengaluru FC - 2016 final
Benguluru FC chu India ram club zingah chuan AFC Cup final lut thei awm chhun an la ni a, 2016 kumah khan final hi an lut a. Federation Cup 2014-15 ah khan an champion a, hei vang hian AFC Cup khel thei turin an tling a ni.
Group stage-ah pahnihna niin, Malaysian club Johor Darul Ta’zim an pha lo a. Round of 16 ah Hong Kong club Kitchee Sports Club chu 3-2 in an hneh a, quarter final-ah Singapore club Tampines Rovers chu 1-0 in an hneh leh bawk a ni.
Semi final-ah hian Malaysian club Johor Darul chu 4-2 in an hneh thei a, bung thar duhawm tak kaiin final hi an lut a. Final-ah hian Iraq club Al-Quwa Al-Jawaiya chu 1-0 in an hneh ta lo a ni.
Dempo SC - 2008 semi final
Dempo Sports Club chu India ram club zinga AFC Cup semi final thleng thei hmasa ber an ni a, 2008 kumah khan an thleng a. 2006-07 National Football League champion an nih avanga he inelnaa tel thei hi an ni.
Goa club hi group stage-ah pahnihna niin, quarter final-ah hian Singapore club Home United chu 5-4 in an hneh thei a. Semi final-ah hian Lebanon club Safa Sports Club chu 1-5 ngawtin an hneh ta lo a ni.
East Bengal - 2013 semi final
East Bengal hian 2013 kumah khan AFC Cup semi final an lut a, India club zingah chuan semi final lut thei hmasa ber dawttu an ni a. 2012 Federation Cup champion an nih avanga he inelnaa tel thei hi an ni.
Red and Golds chu group stage-ah an group-a chungnung ber an ni a, round of 16 ah Myanmar club Yangon United chu 5-1 ngawtin an sawp zui a. Quarter final-ah Indonesian club Semen Padang chu 2-1 in an hneh leh a, semi final-ah erawh he mi kuma champion zui ta Al-Kuwait chu 2-7 ngawtin an hneh ta lo.
Bengaluru FC - 2017 inter-zone play-off final
2016 AFC Cup final lut thei Bengaluru FC chuan 2017 inter-zone play-off final an thleng thei a. Group stage lamah a chungnung ber niin DPR Korea club April 25 chu 3-0 in an hneh a. Play-off final-ah hian Tajikistan club Football Club Istiklol chu 2-3 in an hneh ta lo a ni.
East Bengal (2004) & Mahindra United (2007) - Quarter final
East Bengal chuan AFC Cup khelh tan kum 2004 ah quarter final an thleng nghal a, 2002-03 National Football League champion an nih avanga he inelnaa tel thei hi an ni a. Group lamah match 6 khelhah vawi 4 an chak a, an chungnung ber a. Quarter final-ah hian Syria club Al-Jaish chu 0-3 in an ngam ta lo.
Mahindra United chuan 2007 AFC Cup quarter final an thleng thei a, an group bikah pahnihna niin Singapore Armed Forces FC an tluk pha lo a. Quarter final-ah hian Lebanon club Al-Nejmeh chu 5-4 in an hneh ta lo a ni.