Chennaiyin FC chuan Manang Marshyangdi chu 2-0 in an hneh a, 2019 AFC Cup Group E inkhelha chak hmel an hmuh hmasak ber a ni.
Nilainia Ahmedabad khawpuia TransStadia-a inkhelah Chris Herd leh Mailson Alves te chuan goal khat ve ve an thun a, heng goal hnih hmang hian Machans te chuan ram hrang hrang club inelnaah a vawi khatna atan chak hmel an hmu ve thei a ni.
Ni 16 chhungin Chennaiyin FC hian game 5 an khel a,Super Cup final-a FC Goa an hneh loh tuma khel mi panga zet chu an thlak danglam a. Raphael Augusto chu a inhliam avangin John Gregory chuan a pawlte chu 4-3-3 in a rem a, tlar hma lai takah Jeje Lalpekhlua chu awmin, a sir ve veah Thoi Singh leh Mohammad Rafi te chu an awm a ni.
Indian Super League (ISL) title vawi hnih la tawh Chennaiyin chuan inkhel tan phat atangin bul an tan tha hle a, Jeje leh Thoi te chu an che fuh chho hle.
Right back Laldinliana Renthlei chuan minute 23-ah a sir lam atangin Nepalese club Manang Marshyangdi goal lamah chuan ball a vawrh phei a, hei hi box chhunga awm Mohammad Rafi chuan goal zawnah a lo pet fuh lo hlauh a ni.
Germanpreet Singh chuan Sujal Shrestha a tih fuh dan a dik vak loh avangin referee chuan yellow card a hmuhtir a. First half chhungin mikhual team Manang tan Sujal chiah hi Chennaiyin goal zawna ball pet awm chhun a ni a, chu pawh chu half time thlen dawn hnaih lamah free kick atanga a pet niin, heta ball kal hi Karanjit Singh chuan harsa lutuk loin a lo man a ni.
Half time thlengin team pahnihte hian goal an thun thei ta lo ve ve a. Chawlhlawk zawh atangin fourth official Yu Ming-Hsun chuan Oman referee Qasim Al-Hatmi chu a thlak a, thil thleng danglam tak a ni.
Second half an tan leh a, rei pawh an inkhelh hmain goal a lut nghal der a, a thlengtu team Chennaiyin chuan hma an hruai nghal a ni.
Minute 51-ah Australian midfielder Chris Herd chuan Mohammad Rafi ball pek chu a la a, Manang Marshyangdi penalty area-ah chuan a luhpui a. Defender a bum hnuah Aston Villa player hlui Herd chuan ball chu goalkeeper Bishal Shrestha chu a pir khum a, Chennaiyin FC chu hma a hruaipui a ni.
An khelh chhunzawm leh deuh chauh a, goal luh atanga minute 2 chiah a ral leh hman tihin goal dang a luh belh leh nghal a. Minute 53-ah Chennaiyin chuan free kick an hlawh a, hei hi Anirudh Thapa chuan a pet a.
Free kick atanga ball kal chu Chennaiyin captain Mailson Alves chuan a lo tauh a. Brazilian star hian ball kal phei chu defender leh goalkeeper te’n an khawih hmain a lo tauh a, goal chhungah chuan a lut a, Chennaiyin chuan 2-0 in hma an hruai theih phah a ni.
Abhishek Rijal chuan substitute bench atanga khelmual a luhchilh hnu lawkah an si phurh pakhat sut theihna hun remchang a nei a, mahse Manag Marshyangdi midfielder Rijal chuan Heman Gurung hnen atanga ball a dawn chu goal sirah a pet ta hlauh a ni.
Hemi hnu hian Thoi chuan a sir atangin Manang goal lamah ball a vawrh phei a, hei hi Thapa chuan a lo tauh a. Minerva Punjab player hlui Thapa ball tauh chu goal zawnah a kal ta lo a, goal thun belh theihna hun tha an neih chu an bawhpelh a ni.
Hun tawp hmain Jeje leh substitute Vineeth te chuan goal thun belh theihna hun remchang an nei ve ve a, mahse hun tawp thlengin goal dang a luh belh ta lo a, Chennaiyin FC chu 2-0 in an chak a ni.
Round hnih khelh tawhah Chennaiyin FC leh Bangladesh club Abahani Dhaka te chuan point 4 ve ve an hmu a, mahse India ram club hi goal difference-ah an that zawk avangin an group hmahruaitu an ni.