01 Aug 2020 04:26

inkhel

AFC Asian Cup-ah Sunil Chhetri an duh ber

Sunil Chhetri chu 2019 AFC Asian Cup kheltu player zingah duhtu ngah ber a ni.

Football ngainatu thahnem takte chuan vote an thlak a, 2019 AFC Asian Cup kheltu player zinga an duh an thlang hlawm a. Ni 19 chhung zet vote hi an thlak a, vote thlaktu mi 5,61,856 zet mai an awm a, India striker Sunil Chhetri chuan vote hi a hmu hnem ber a ni.

Chhetri hian Uzbekistan player Eldor Shomurodov chu a khum a, India captain hian vote 51% a hmuh laiin Eldor Shomurodov hian vote 49% a hmu ve bawk a, chuti takin an inthlau hran lo hle.

United Arab Emirates-ah AFC Asian Cup 2019 an khel a, India chuan Thailand chu 4-1 in an hneh phawt a, a hnuah a thlengtu UAE leh Bahrain te chu an hneh lo a, group stage an pal tlang zo ta lo a ni.

India aiawhin Sunil Chhetri chu kum 15 zet a feh chhuak ve tawh a, national team tan hian game 115 a khel tling tawh a, hengah hian goal 72 zet mai a thun tawh a. June 12, 2005 ah khan ram tan a khel tan a, Quetta ah thenawm ram Pakistan nen an inkhel a ni.

Tuna football la khel mek zingah Sunil Chhetri hi ram tana goal thun hnem ber dawttu a ni mek a, Portuguese superstar Cristiano Ronaldo chiah a pha lo a, Argentine superstar Lionel Messi ai pawhin a chungnung zawk a ni.

Kum 35-a upa Chhetri hi football khelh a chawlhsan hun tur an zawt fo a, a chawlh hun tur a sawi theih rih loh thuin a chhang thin a. La inkhelh zel chungchang chu a ke dinhmun a zir a nih tur thu a sawi chhuak.

“Tun dinhmunah chuan football khelh hi nuam ka la ti em em mai a, tun hnaiah chuan ka la chawlh mai ka ring lo,” tiin Chhetri chuan a sawi.

“Kan ram aiawha kum 15 zet ka inkhel thei hi lawmawm ka ti a, duhthusam a ni ber mai a. Kum 3-4 vel ka inkhelh zui leh chuan kum 20 dawn chu ram aiawhin ka feh chhuak ve dawn tihna a ni ang. Kum 20 em em kan ram tana ka khelh theih hi ka ring pha ngai lo reng reng,” a ti bawk.