Kum 68 mi Advocaat hian Sunderland hi kumin March thla atang khan a enkawl tan a, season liamta khan Premier League atanga tla tawh mai tura rin team hi a chhanhim.
Season tawp khan team enkawl lam chawlhsan a tum hman a, mahse kum khat daih contract a ziak leh a tun season-ah pawh hmasa ang bawkin an che chhe tluang zel.
A ban chungchang hi sawiin Dutch manager Advocaat hian, "Game riat chauh kan khelh hnuah he thutlukna hi ka siam a, inthlak danglamna hun pek hi ngai tawh a ka hriat vang a ni." tiin a sawi.
Sunderland chairman Ellis Short pawhin an manager bang ta chungchang hi sawiin, "A thutlukna hi pawi ka ti takzet a, mahse ka zahsak bawk." a ti.
Black Cats hian an manager chauh hi an chan lo va, Advocaat thachhang dawltu assistant head coach Zeljko Petrovic pawhin a hna a bansan ve bawk.
Sunderland hian kum 2011 November thlaa Steve Bruce an ban hnu khan Martin O'Neill, Paolo di Canio, Gus Poyet leh Advocaat-te hi an ruai tawh a, mahse an tum angin an hlawhtling thei lo.
Netherlands, Russia leh South Korea national team-te pawh lo kaihruai tawh thin Advocaat hian Sunderland hi tun season-ah vawikhat chiah a chakpui a, League Cup-ah League Two-a khel mek Exeter an hneh a Premier League-ah chuan 19-na an ni mek.