23 Mar 2020 10:17

bakteaJr.

Mizo tlangval

​Adriano: Talent turu thamral

Adriano a hmingpum chu Adriano Leite Ribeiro niin, Adriano tih bakin an sawi ngai lem lova, football tun hnai chauha en te tih loh chuan kan hre theuhin a rinawm. Adriano hi kum 1982 February thla ni 17 khan Rio de Janeiro, Brazil-ah a pianga, striker niin, 6 ft 2’ a sang a ni a, tunah hian kum 38 mi a ni mek.

Adriano hi Brazilian club Flamengo chhulchhuak a ni a, season khat chhung Flemengo senior team-a a awm hnuah Italian club hlun Inter Milan chuan leiin Europe-ah an hruai lut. 

Brazil U17 leh U20 tan te a khelh hnuah kum 2000 khan Brazil senior team-ah koh niin kum 2010 khan Brazil World Cup squad-ah telh a ni lova, hemi hnu hian ram tan a khel leh tawh lo. Brazil tan Adriano hian game 53 khel hmanin goal 27 a khung.

Inter-a a luh hnu hian Fiorentina-ah loan-in Adriano hi a khel zuaia, chuta tang chuan Parma-ah lut nghetin Parma-ah hian a che tha chho va, Adrian Mutu nen inkawp fuh hle in, Parma tan hian khelh 36-ah goal 22 a khung hman.

Inter Milan chuan Adriano hi kum 2004 January thla khan an lei let leh ta a, a manah euro maktaduai 23.4 sengin, hemi season chawhnu chhung ringawt hian goal 12 a khung leh hman. Kum 2004 nipui atanga kum 2005 nipui chhung khan Adriano hi a che tha hle a, Inter tan hian 2004-05 season chhungin goal 42 ngawt a khunga, kum 2005 September thla-ah Inter hian kum 2010 June thla thleng daih contract an ziahpui nghal nghe nghe.

Inter-in contract thar an ziahpui hnu atangin Adriano hian ngai a awh chho thei ta lova, kum 2004-a a pa boral avangin depression-in tibuaiin, zu lamah a tlan chho a, hei hi a tlakchhiatpui ta a tih loh theih loh.

Parma atanga Inter Milan a zawm lai khan ani aia striker hlauhawm leh tha hi Europe-ah an tam bik lovang. Mahse kum 38 mi hian kum 2004-a a pa boral atangin depression-in a tih buai thu leh zu a in nasat thu hi a mah ngei pawhin a sawia, rui chunga training a zawm hial thin thu pawh a sawi.

Adriano talent neih that zia hi kan hre hlawm viauin a rinawma, 'Brazilian' Ronaldo hnuah Adriano aia striker beiseiawm hi an awm leh tawh lo hial anga sawi thin a ni. Adriano hian striker tha ni turin neih loh a nei lova, a tlan chaka, a che ranga, ball a thiamin tharum a ngah em ema; a finishing, long shot, heading pawh duhthusam vek niin a ke veilam leh dinglamah buaina a nei lo.

Swedish striker Zlatan Ibrahimovic pawhin Adriano hi Inter-ah a khelhpui hmana, Zlatan hian Adriano hi a khelhpui kham lo hle niin a lang. Zlatan chuan Adriano chungchang lo sawi tawhin, “Player tha tak tak leh talent turu tak tak ka khelhpui tawh thina, mahse Adriano kha ka khelhpui aia rei kha khelhpui ka chak hle. Eng angle atang pawhin a shoot theia, tu man ball an chhuhsak thei lova, an kherhthlu thei lova, ramsa an maia turu a ni,” a lo ti tawh.

Adriano hi a tlakchhiat chhoh em avangin Inter chuan loh theih lovin an chhuah tir a lo ngai ta a, kum 2008 khan Brazilian club Sao Paolo-ah loan-a khelin, hetah hian a rawn che tha chho leh hreta, Brazil pawhin an lo leh nghe nghe a, kum 2009 khan Flamengo-ah a kir lehin, kum 2010 khan Europe-ah kirin Roma tan a khela, kum 2011 khan Brazil-ah haw lehin Corinthians tan leh Atletico Paranaense tan te a khel leha, kum 2016 khan inkhelh a chawlhsan thu a puang.

Zu khan tibuai lo ta se, eng ang takin nge Adriano hi a hlawhtlin ang tih chu ngaihtuah tham tak a ni a, a chanchin atang hian Mizo thalai zawkte pawhin mahni nun kan in leta, zu hian hlimna tlauntling min pe lova, ruihtheih thil intihbuai tir hi a hlauhawm kan zir chhuah thar ngei a va ngai lehzual em!