14 Sep 2018 11:56

inkhel

Adidas in Swapna Barman pheikhawk an siam dawn

Adidas chuan Asian Games gold-medallist Swapna Barman harsatna lian tak mai an sut kiansak thei dawn a, a bun theih tur pheikhawk chu a hranpain an siamsak dawn a ni.

Swapna Barman hian kezungtang 12 ngawt mai a nei a, hei vang hian pheikhawk bun lamah harsatna a nei thin a. Heti chung hian Indonesia rama Asian Games neih zawh takah khan heptathlon-ah gold medal a la a, India tan he inelnaa gold medal la thei hmasa ber a ni.

A ke lehlam lehlamah hian kezungtang 6 ve ve a awm a, gold medal a lak hnuah Swapna Barman hian a tana pangngai taka bun theih tur pheikhawk siam thei awm se a tih thu a sawi chhuak a. He a tawngkam hi Sports Authority of India (SAI) chuan an ngaipawimawh hle a, a duhthusam chu a takah a thleng thei dawn ta a ni.

Sports Minister Rajyavardhan Singh Rathore chuan Swapna thil sawi hi tihhlawhtlin ngei ni se a tih avangin hma a la nghal a. SAI mai bakah a kaihhnawih theih turte chu bawhzui turin a ti vat a, anni hian an theihna kawng hrang hrangah hma an la a, Swapna duh ang hi an tihsak theih tur thu an sawi a ni.

SAI hian Adidas an dawr a, an thil duh te an sawiho hnuah Adidas chuan Swapna Barman pheikhawk bun theih tur chu siamsak an remti a. SAI hian Swapna coach chu a awmna SAI Centre of Excellence, Kolkata-ah an bepawp tawh a, Swapna ke len zawng te, a ke pian te leh a duh anga a sawi fel theih nan pheikhawk lem thlengin an thawn tawh a ni.

2012 khan Swapna Barman hi an hmelhriat tan a, a theihna te an hmuhin SAI Centre of Excellence, Kolkata-ah hian training an zawmtir a. Nikum September thla khan Swapna hi sorkar hnuaia Olympic lawmman la thei tura an beisei Target Olympic Podium Scheme (TOPS) ah an la lut a ni.