Aizawl District Football Association (ADFA) I Division League chu September ni 17, Thawhlehni khan AR Lammualah round 2 khelh a ni a, inkhel hnasa zawk Bethlehem Vengthlang FC leh Youngstar United FC, ITI chak zawk awmlo in 1-1 in an inhneh tawk a, point 1 ve ve an hlawh chhuak.
Goal lut te hi first half leh second half-a lut an ni a, first half-ah Bethlehem Vengthlang FC tan C.Ramnunpuia goal khung chu second half-ah Youngstar United FC, ITI tan Aldrin Ramthansanga chuan an siphurh a rul a, chak zawk awmlo in khelmual an chhuah san a ni.
Match hnih khel tawh atangin Bethlehem Vengthlang FC hian point 1 an nei tawh a, Table -ah pasarihna an ni mek a, Youngstar United FC, ITI hian point 1 nei ve bawkin goal deference-ah an sang zawk a, parukna an ni mek bawk.
Inkhel hnuhnungah 1st MAP Academy leh Dinthar FC te chak zawk awmlo in 1-1 in an inhneh tawk ve bawk. Goal lut te hi second half-a lut ve ve an ni a, second half tan atanga minute 19-ah 1st MAP Academy tan Lalthakima goal khung chu huntawp dawn minute 17 ala awmin Dinthara FC tan C Lallawmsanga chuan an siphurh a rul a, chak zawm awmlo in point 1 ve ve an hlawh chhuak.
Match hnih khelh atangin 1st MAP Academy hian point 2 an nei tawh a, table-ah palina an ni mek a, Dinthar FC hian point 1 nei ve bawkin point 1 nei pali zingah goal deference-ah a hniam ber a, amawngphah an luh lum rih a ni.
September ni 18, Nilainiah round 2 khelh zawh ang a, chawhhnu dar 12:00-ah FC Bethlehem leh Aizawl FC Academy an inhmachhawn ang a, dar 2:00-ah Sihphir Venghlun FC leh Kanan FC an inhmachhawn ang.
September ni 17, Thawhlehni Results
12:00 PM Bethlehem Vengthlang FC 1-1 Youngstar United FC, ITI
(C.Ramnunpuia 21') (Aldrin Ramthansanga 64')
02:00 PM 1st MAP Academy 1-1 Dinthar FC
(Lalthakima 59') (C.Lallawmsanga 73')
September ni 18, Nilainiah round 2 Fixtures
12:00 PM FC Bethlehem vs Aizawl FC
02:00-ah Sihphir Venghlun FC vs Kanan FC