UFC fighter Kelvin Gastelum chuan July thlaah insual tura rawn kir ngei a tum thu a sawia, UFC middleweight champion Israel Adesanya chu a mah aia a that bikna a awm loh thu a sawi bawk.

Gastelum leh Adesanya te hi UFC 236 khan an lo inhmachhawn tawha, hetah hian round nga insualin, Adesanya hi unanimous decision-in a chaka, fight hmuhnawm tak a ni nghe nghe.

Adesanya nen round nga an insual hrep hnuah hian Gastelum hi a chawl rei hran lova, thla ruk hnuah insual leh nghalin, Darren Till chu UFC 244-ah split decision hmangin a hneh lo.

Gastelum chuan, “Israel nen kan insual zawh khan duh aiin ka chawl rei lo mah mah tih ka zir chhuaka, mahse ka hneh loh avang khan eng emaw lan tir ngaiin ka inhria a, insual leh thuai kha ka duha, Darren Till kha ka hmachhawn ta a ni.

“Ka duhdanin thil a thleng ta lo chianga, kha fight atan khan rilru lamah ka inbuatsaih tha tawk lo hle. Training erawh ka nei tha a, mahse Darren Till kha ka lakah ‘plan’ mumal tak a lo neia, min hneh dan tur a lo zir tha hle. Khami fight zawh khan kha aia chawlh rei hret ka mamawh tih ka inhrechhuak,” a ti.

Adesanya nena an insual chungchang sawi zuiin Gastelum chuan, “Kei aia a that vanga min hneh a ni lova, ka hnek fuh zat aiin vawi khat vel chauhin min hnek fu tam ang vel chauh a ni. Khami zan khan kei aia fighter tha a nihna ka hre lo. Khami tum khan rilru leh taksa lamah in buatsaih tha tawk lo hle in ka inhria a, chubakah ani khan game plan mumal leh tha tak a nei bawk a ni,” a ti.

A inhliam chungchang leh a dam tawh viau thu sawiin, “January thla khan ka LCL a thlera, thler nasa viau mahse zai ka ngai lo hlauh. Tunah hian therapy te tiin ka dam chho meka, 85% atanga 90% velin ka dam tawh. July thla hian he hripui leng dinhmun tur hi ka sawi thei lo na a, July thla hi chuan insual tura rawn kir tawh ngei ka tum a ni,” a ti bawk.