February ni 3, Inrinni khan ADBBA Division III Screening final khelh a ni a, Kanan BC chuan 75-64 a Zemabawk VR4 hnehin an champion.
Hmeichhia Division League-ah Team Alpha chuan 46-29 a Bungkawn BC hnehin an champion ve bawk. February ni 5, Thawhtanniah Division I league khelh chhunzawm a ni dawn bawk a ni.
(adsbygoogle = window.adsbygoogle || []).push({});
ADBBA Division III Screening champion hmasa ber ni turin Kanan BC chuan Zembawk VR4 75-64 in an hneh. Team pahnih te hi an intum tawk hle a. VR4 hi veteran player, Davy Lalruatliana'n a ho a, half time-ah point 8 laiin hma an hruai a ni. Kanan BC in half time an hmang tangkai a, third quarter-ah bul an rawn tan tha a, 50-50 in an rawn nihrualpui. Kanan BC game a tha chho tulh tulh a, a tawpah 75-64 in hnehna an chang.
Kanan BC hi group stage-ah best loser niin quarterfinal an inham tang thei hram a, mak tak mai a rawn che tha chho leh in atawpah Champion hial an ni thei a ni. Kanan BC tan hian Rozama chuan 25 points a thawk chhuak a, Junior-a'n 15 points thawk chhuak bawkin Nuna'n 12 points a thawkchhuak ve bawk.
Zemabawk VR4 tan Zela 23 points, PL-a chuan16 points leh Davy-a 14 points thawk chhuak ve bawk mahse, champion turin a tawk zo ta lo a ni.
Division III final khelh hma hian ADBBA Division I league inkhel vawi hnih awmin match hmasa zawkah Ramhlun SC chuan VMS, Kulikawn 72-61 in an hneh a. Inkhel hnuhnungah Nursery BC chuan Dawrpui Vengthar SC 75-64 in an hneh ve bawk. Hun rei tak Division I luahlumtu Dawrpui Vengthar chuan point hmu tlem berin an relegate a, Division II ah an awm ta a ni.
Hmeichhia Division League-ah hian team pariat an intumkual a, point hmu sang pahnih zingah team thar Team Alpha leh ADBBA Cup 2017 Champion, Bungkawn BC an intum a, final match boruak sang takah first quarter atangin Team Alpha hian hma an hruai chho nghal a, Second quarter a tawp meuh chuan Team pahnih te in thlauhna chu point 10 a ni. Third leh Fourth quarter-ah Bungkawn BC chuan chak tumin theih tawp chhuah mahse Team Alpha an tang tluan thei thung a, hun a tawp meuh chuan Team Alpha chuan 46-29 a hnehna changin an champion ta a ni.
Team Alpha tan hian Shillong nula, Iairy chu a thawhhlawk hle a, entu mipui lawm a hlawh bakah game a chawk nung a, ball dribbling a ngheh that bakah attacking lamah a tangkai hle a, point 17 lai a nei a, Naomi'n point 8 a nei ve bawk.
Bungkawn BC tan hian Puii'n point 11 a thawkchhuak a, Mawimawii'n point 5 a thawh ve bawk.
(adsbygoogle = window.adsbygoogle || []).push({});