Paolo Maldini hi kan hre fur hlawm ngei anga, AC Milan player ropui ber tia chhal ngam a ni a, Italy player ropui ber zinga mi a ni bawka, a hunlai mai nilo football chanchina defender ropui ber ang hialin mi tam takin an sawi thin bawk.

Maldini hian a career pumpui AC Milan-ah a hmang zova, season 25 chhungin game 902 lai a khel. AC Milan-ah hian Serie A title pasarih, Champions League title panga, Supercoppa Italiana panga, European Super Cup pali leh Club World Cup pakhat a chawi bakah cup tenau chawi pawh a nei nual.

A hmingpum chu Paolo Cesare Maldini a ni a, kum 1968 June 26 khan Milan, Italy-ah piangin tunah hian kum 51 mi a ni mek. Ft 6’ 1in a sang a nia, defence line-ah khelh theih lohna a nei lova, a vanglai hun erawh left-back lamah a hmanga, a career tawp lamah centre-back –ah a khel thung.

Kum 2009 khan kum 41 mi niin inkhelh a chawlhsana, International football erawh kum 2002 khan a chawlhsana, Italy tan game 126 a khel a goal sarih a khung bawk. Kum riat chhung Italy captain a ni a, World Cup vawi li a khel. Italy tan hian trophy chawi nei lo mahse World Cup final leh Euro final vawikhat ve ve a thlen pui.

Serie A game khel hnem ber niin, game 647 lai a khela,goalkeeper Buffon nen he record hi an intawm meka, AC Milan tana khel hnem ber a ni bawk. Kum 2012 khan Italian Football Hall of Fame-ah a hming hi dah a ni.

A vanglai chuan thatlohna lai a nei lo a tih theih awm e. Full-back niin a left-back-ah a vanglai hian a khel tam ber a, a upat deuha a speed a muan deuh hnuah centre-back lama pawh luh a ni.

Sawi angin thalohna lai a nei lova, a tlanchaka, tharum a ngaha, ball a khalh thei hle a, thahrui a nga em ema, ball kangah a hlauhawma, a timing a tha in, a tackle a thaa, defender tawhkhrh tak a ni.

A ke dinglam hmang thiam zawk mahse AC Milan manager hlui Ariggo Sacchi chuan right-back-ah Mauro Tassotti a awm avangin Maldini hian a ke veilam a hman thiam tho bawk avangin left-back-ah a khelhtir ta a ni.

Tul lova lehlam pawl kherhthluk emaw a nei ngai lova, amah ngeiin “mi ka kherhthluk a ngaih tawh chuan ka tihsual tawh vang a nimai” a ti hial a ni.

Maldini hian coaching lam a luhchilh tur thu alo sawi chiang tawha, Miami FC neitu pakhat zinga mi niin, tunah hian AC Milan technical director a ni mek.

Chelsea-in AC Milan atangin manager Carlo Ancelotti an lakluh khan Maldini hian a pu hlui hi a zawm teuh hle a, Chelsea neitu Roman Abramovich leh Ancelotti-te nen pawh an inhmuh vek hnuah Ancelotti chuan a sawmna chu Maldini hian a hnawl tak thu a sawi a ni.