AC Milan chuan Swedish striker Zlatan Ibrahimovic chu an lalut leh dawn niin a langa, tunah hian inbiakna an kalpui mek niin Sky Italia chuan a tarlang.

Zlatan hian tun thla khan LA Galaxy a chhuahsan avangin tunah hian free-agent a ni meka, club-te’n bazar hun nilo mahse an lalut theia, a club hlui AC Milan lamah a kir dawn niin a lang.

Zlatan hian Bologna a zawm dawn anga tarlan lo ni tawh mahse AC Milan an lo lang leha, Bologna ai chuan San Siro hi a zawm a rinawm zawka, tunkar hian an inlakluh fel hman pawh a rinawm viau.

Zlatan hian kum 2010 atanga kum 2012 chhung kha AC Milan-ah hian a lo khel tawh a, tunah hian Zlatan-a agent Mino Raiola leh Milan hotute chu an inbe mek tih chanchinbu mite chuan an tarlang bawk.

LA Galaxy a chhuahsan tur thu a sawi rualin Zlatan hi European club-te’n an ngaihven nghala, kum 38 lai ni tawh mahse club lian thenkhat chuan an la iai lo hle niin a langa, AC Milan hian thla 18 chhung contract ziahpui an huam niin sawi a ni.

LA Galaxy-a a cham chhungin Zlatan hian game 58 a khel hmana, goal 53 lai khungin, AC Milan-a a awm lai khan game 85 atangin goal 56 a khung bawka, kum 2011 khan Serie A title a lakpui nghe nghe a ni.