AC Milan leh Inter Milan te chuan an khelmual intawm chu sak thar an remti a, Italy rama stadium lar ber pawl San Siro chu thiah a ngai dawn a ni.

Italian club lian pahnih AC Milan leh Inter Milan te hian an khelmual hman mek San Siro chu hnuchhawn a, 2022-23 season a hman tan theih tur khelmual thar chu £630 million zet senga sak an tum a. Ruahmanna an siam dan chuan San Siro chei that aiin hmun danga khelmual thar din mai hi fuh zawkin an hria a ni.

An stadium thar tur hi tuna an hman mek piah lawka sak atan ruahmanna an siam mek a. San Siro-ah hian entu mipui 80,000 an leng a, an stadium thar turah chuan 60,000 vel an leng dawn niin an sawi a, thuneitute pawhin an duhna hmuna stadium thar din hi an phalsak tawh a ni.

San Siro thlaktu tur hi NFL team New York Giants leh New York Jets te’n an hman mek Metlife Stadium ang deuha duan a nih hmel a. Concert tih vel huaihawt theihna tur, mi 5,000 vel thut theihna a awm tel theih dawn bakah shopping complex changtlung tak a awm tel bawk ang.

Milan mayor Beppe Sala chuan club pahnihte hnenah hian San Siro thar sak chu thil hautak zet mai a nih tur thu a sawi tawh a. Senso theih turte an han chhut pawhin Milan khaw club lian pahnihte hian an inhuam thu an sawi a, ruahmanna chu a taka chantir ngei an tum ta a ni.

Tun thla tir lamah khan Beppe Sala chuan, “Stadium thar sak chu hmalakna hautak zet mai a ni dawn chiang a, sum tam tak sen a ngai ngei dawn a. Kei chuan a hautak dawn tih chiah ka sawi dawn a, an rilru thlaktir ka tum hran lo,” a ti.

“Inter leh Milan atang hian rawtna mumal tak leh dilna te ka ngaichang mek a, chawlh hma hian engkim an rawn tih hman ngei ka beisei a. Ka ngaihdanah chuan San Siro hi hmun ropui tak a ni,” a ti bawk.

AC Milan chuan San Siro hi 1926 atangin an hmang tawh a, 1947 atang khan Inter Milan nen hian an intawm tan a ni.