Serie A champion lai AC Milan chuan, Chelsea winger Christian Pulisic chu an duh niin chanchinbu mite chuan an tarlanga, Milan hian Pulisic-a chungchangah hian Chelsea an dawr tan tawh nia tarlan a ni bawk.

Pulisic hian Chelsea-ah duh angin inkhelhna hmun a chang tam thei lova, Chelsea tan hian competition hrang hranga vawi 21 tun season-ah inlan tawh mah se, Premier League-ah vawi ruk bak inkhel bul a la tan lova, competition hrang hrangah goal khat bak a la khung lo bawk a ni.

Chelsea hian an tlarhma lam an thawmtha nasa hle a, tun thlasik bazar chhungin Mykhaylo Mudryk leh Noni Mudueke te an lalut tawh a, hemi avang hian remchang an hmuh chuan Pulisic hi chhuah tir an tum niin chanchinbu te chuan an ziak.

Nikum atang khan Pulisic hi Chelsea chhuahsan tur anga sawi a ni nasa a, Newcastle United leh Manchester United te bakah, a club hlui Borussia Dortmund nen pawh sawizawm an ni a, Stamford Bridge-ah hian season khat dang contract a la nei.

Chelsea hian kum 2019 khan kum 24 mi hi German club Dortmund atangin an lalut a, a manah pound maktaduai 58 vel an seng nia sawi niin, USA international hi American footballer man to ber a ni.

Dortmund lamah che tha viau mah se, England-a a input luh hnuah erawh Pulisic hian beisei a pha lo hle a, hliamin a tlakbuak nasa bawk nen, Chelsea hian tun thla chhunga an hralh loh pawhin, nipui bazar inhawn hunah an chhuah tir ngei a rinawm a ni.