AC Milan mi ropui Paolo Maldini-a fapa Daniel Maldini chuan Sunday zan Serie A inkhelah AC Milan tana a game hmasa ber a khela, Verona hmachhawnin, he inkhelah hian team hnihte 1-1 in an inhnehtawk.

Kum 18 mi Daniel hi Maldini chhungkaw zinga mi AC Milan tana khel thei chhuan thumna a ni a, a hma hian a pa Paolo leh a pu Cesare Maldini-te pawh AC Milan tan hian lo khel tawhin captain an ni ve ve nghe nghe a ni.

Daniel-a pa leh pu te hi defender ve ve ni mahse ani erawh attacking midfielder a ni a, AC Mlan academy chhuak niin Italy tan U18 leh U19 lamah te a inlan tawh bawk.

Daniel hian a pa Paolo-a’n AC Milan tana a debut a khelh atanga kum 36 hnuah a debut a khel ve a, a pu Cesare-a’n a debut a khelh atanga kum 66 hnuah a debut hi a khel.

AC Milan tana a game hmasa ber a khelh chungchang sawiin Daniel chuan, “Ka debut hi ka suangtuahna a tak ram lo thleng a ni a, kan result erawh a duhawm loh. Verona lakah khan kha aia khel tha thei kha kan ni a, mahse ka game hmasa ber ka khel thei hi ka lawm hle bawk.

“Verona kha team tha an ni a, point 3 hlawhchhuah kan phu a, mahse kan chak zo ta lova, a dawt lehah chuan hnehna kan chan tawh ngei ka beisei. He debut hi ka hmachhawp a ni a, tunah chuan chhunzawm zel ka tum dawn a ni,” a ti.

Daniel hi kum 2001 October thla ni 11-a piang a ni a, 5ft 11’ a sang niin jersey no. 98 a ha a, a u Christian pawh pawh footballer niin, kum 23 mi Christian erawh hi chu Pro Sesto tan a khelh thung a ni.