13 Jun 2019 02:23

bakteaJr.

Mizo tlangval

AC Milan-in Lovren an hmu tai

Italian club hlun AC Milan chuan Liverpool defender Dejan Lovren chu an hmu tai a, lakluh tumin an dawr dawn niin Sky Italia chuan a tarlang.

Lovren hi Liverpool-ah a inkhel tam lova, season liamta khan a inhliam zeuh zeuh avangin vawi 18 bak Reds tan a inlan lova, a dam pawhin Liverpool boss Jurgen Klopp chuan Lovren ai hian Virgil Van Dijk, Joe Gomez leh Joel Matip-te a thlang fo.

AC Milan hian an manager Gennaro Gattuso an ban a, season thar atan inbuatsaihna kalpui tum mekin, Lovren hi an hmu tai viau niin a lang.

Thlalehah kum 30 tling mai tur Lovren hian Liverpool chhuahsana a khelh tam zawkna tur lam pan a hreh lutuk a rinawm lova, season tharah Milan player a ni lovang tih a sawi theih loh.

Sky Italia tarlan danin AC Milan hian mumal takin Lovren hi an la dawr lova, manager thar an lakluh hnuah an dawr tak tak dawn niin a ziak. Gattuso an ban hnuah Milan hian manager thar an la zawng mek zela, Sampdoria boss Marco Giampaolo chu an lakluh a rinawm a ni.

Liverpool hian squad an nei tha sa hle a, tun nipui chhungin player lakluh vak an tum lo ni te pawhin chanchinbu thenkhat chuan an ziak. Daniel Sturridge leh Alberto Moreno-te an chhuak dawn a, Lovren hian an hnung a zui dawn em tih chu tun thla chhung ngeiin a chian a rinawm a ni.