AC Milan chuan Filippo Inzaghi an ban hnuin Serbia boss hlui Sinisa Mihajlovic chu an team kaihruai turin an lalut fel ta.
Kum 46 a upa Yugoslavia defender lo ni tawh thin Mihajlovic hian tun thla tir khan Serie A club Sampdoria a lo chhuahsan ve tawh a ni.
Nikum June thla khan Inzaghi hian a team-mate hlui Clarence Seedorf chu Milan coach ni turin a lo thlak ve tawha, season hman liam takah khan AC Milan chu league ah 10-na a nihpui pha tawk a ni. 2014-15 season khan vawi 13 chiah hnehna a chanpuia, champions Juventus chu point 35 laiin an thlau bawk.
Mihajlovic hian a vanglaiin Roma, Sampdoria, Lazio leh Inter Milan ah te a lo khel ve tawh thina, ram tan tum 63 lai a fehchhuak hman bawk. Inter a a khelh laiin kum 20 zet a lo khelh tawh professional football chu a chawlhsan thu a puanga, Inter ah vek Roberto Mancini-a assistant ah a tang chhunzawm a ni.
Bologna, Catania leh Fiorentina ah te hun rei lo te a hman hnuin April 2012 khan Serbia boss atan ruat a ni a, match 19 lai kaihruai hmanin tum sarih hnehna a chanpui thei a ni. November 2013 ah Sampdoria ah lut lehin a luh kumah 12-na a nihpuia, season hman liam takah khan 7-na ah a invawrh chhoh pui bawk.
AC Milan in an ban tak an player hlui kum 41 a upa Inzaghi hian 2001 atanga 2012 thleng khan Milan tan a khela, youth-team coach a an ruat chhunzawm hnuah Seedorf a rawn thlak ta a nih kha. Tunhnaia che tha lo tak AC Milan hian Serie A title 18 leh European Cup 7 lai an lo la tawh a ni.