08 Nov 2019 04:58

inkhel

AC Milan-ah Zlatan Ibrahimovic?

Zlatan Ibrahimovic chuan Major League Soccer kalsanin Italy ram lam a pan leh dawn niin thu a thang mek a, Serie A club AC Milan chu January thlaah a zawm dawn niin an sawi.

2018 ah khan Zlatan Ibrahimovic chuan MLS club LA Galaxy a zawm a, kumin December thlaah hian kum hnih chu a hmang zo ve dawn tawh a, a club tan hian goal 50 chuang zet chu a thun hman a ni.

LA Galaxy chuan October thlaah khan an hmelma Los Angeles FC nen MLS Cup play-off an khel a, hetah hian Zlatan chuan goal thun mah se an club chu 3-5 in an chak ta lo a ni.

Tun hnaia thu thang vel chungchangah Zlatan chuan a chhuah dawn leh dawn loh thu engmah a sawi chhuak hran lo a. Europe khawmualpui lam a pan tak tak dawn leh dawn loh pawh sawi chian a nei lo a, hetih lai hian MLS commissioner Don Garber chuan Serie A lam pan a tum thu hi a lo sawi chhuak thung a ni.

Don Gerber chuan, “Zlatan hi pa dangdai zet mai a ni a, huhang ngah zet mai niin, amah ang hi khawi hmunah pawh kan mamawh viau zel a. David Beckham te ang bawka boruak siam thei chi a ni,” a ti.

“Kum 38-a upa a ni tawh a, khawvela club lian berte zinga mi AC Milan chuan an la lei duh a, tunah hian la turin thil an tifel mek a ni,” a ti bawk.

A sawi zelnaah, “Tun hnai kum hnih chhungin chanchin lian tham tak tak a nei fo a, goal thun kawngah thawm a nei deuh reng mai a. Khelmualah hmuh a nuam a, a che vel hian mi a tiphur thei viau zel a. A nihna takah chuan MLS ah hian la awm zui zel se ka ti hle a, chutiang thlentir theitu tur chu LA Galaxy hi an ni,” a ti.

Ibrahimovic hian 2010 leh 2012 inkarah khan AC Milan tan a lo khel tawh a, hun rei vak lo chu Barcelona ah pawh khel tawhin, Paris Saint-Germain ah pawh rei ve angreng tak chu a khel tawh bawk a ni.

2016 kumah khan Manchester United a zawm a, tun hnaiah pawh Old Trafford nen hian an sawi zawm zeuh zeuh a, heng thawm ri karah hian San Siro lam kawng zawh chu a rinawm deuh ber a ni mek a ni.

Tun season-ah Milan chu Serie A lamah an che fuh vak lo hle a, 12-naah an awm mek a. Thla thum chauh an club a enkawl hman tihin an manager Marco Giampaolo chu an ban a, October thla tir lamah khan Stefano Pioli chu an ruai tan chiah a ni.