Zirtawpni zanlai khan Serie A club AS Roma chuan tun season atana an league game hnuhnung ber khelin, hetah hian Roma striker Tammy Abraham chuan record thar a siam.

Roma hian an league game hnuhnung berah hian Torino tlawhin, si thum faiin hnehna an chang a, English striker Abraham chuan goal hnih khungin, Lorenzo Pellegrini chuan goal khat a khung bawk.

Heti hian Abraham hian Serie A-ah goal 17 khungin season a khar a, Serie A season khat chhunga English player goal khung hnem ber thar niin, kum 1961-62 a Inter Milan tana Gerry Hitchens-a record lo siam tawh chu a khum.

Roma hian nikum August thla khan kum 24 mi Abraham hi Chelsea atangin an lei a, a manah pound maktaduai 34 bawr vel sengin, Roma tana a season hmasa berah a che tha nghal hle a, goal 17 a khung bakah hian assist 4 nei bawkin, Europa League khel tura Roma an inpet tlinna kawngah a thawhhlawk hle.

Khelh 38 atangin Roma hian point 63 an nei a, paruknaah awmin, season tharah Europa League an khel dawn chiang a, tunah hian Europa Conference League final khel turin an inpuahchah leh nghal dawn a ni.