Zothan Autoworks LPS Pro Fight 2016-ah Abel Lalawmawia chu tel tumin inbuatsaih mah se a taksa lamah harsatna a neih avangin a inlan thei dawn lo. Serchhip Boxer Abela chuan LPS Pro Fight hmachhawn leh ngei tumin a inbuatsaih a, harsatna leh na neuh neuh nei chungin inpuahchah lui hram hram mah se chawlh mai a ngai dawn tiin facebook-a ama phekah a tar lang.
2009-ah Pro Fight neih tan a ni a, Abel-a'n final-ah Serchhip boxer ve bawk Ngurdingliana hnehin light heavyweight title la hmasa ber a ni. A zawnin vawi nga Title Fight a hmachhawn a, kum kal ta khan a hma kuma a hneh tawh PC Lalmuankima lakah tlawmin kawnghren a hloh. Assam Rifle fighter chuan Pathian khawngaihna changin vawi nga tluang takin title a chuh tawh a, han tawpsan mai chu lunglenthlak dawn hle mah se LALPA hnenah a hma lam hun a hlan a, tel leh a rem ta lo a ni, a ti.
2010 khan inhnial theih takin J Vanlalhruaia a hneh hram a, a vawi khat nan title a humhim. 2011-ah Dailova nen inbeiin a chak a, 2014 khan Muankima hmaah hnehna chhinchhiahtlak changin vawi li a zawna champion thei awm chhun leh tum thum title humhim hmasa ber a ni. Kum kal ta khan a vawi khat nan Abela a tlawm a, a hma kuma a hneh tawh Muankima lakah chak nawn tumin inrintawkna nei sang hle mah se round li an inbeih hnuah unanimous decision-in Saron Veng tlangval a hneh lo.
Pro Fight chanchina boxer hlawhtling ber Abela hian Muankima a hneh loh hnuin boxing chawlhsan a tum thu a sawi tawh a, a rilru thlakin September 10, 2016-a tan tur Zothan Autoworks LPS pro Fight-ah tite lak kir leh tumin inbuatsaihna kalpui leh mah se a beisei angin thil a kal tluang lo va, boxing chawlhsan turin thutlukna a siam ta a ni
Zothan Autoworks LPS Pro Fight September 10, Inrinni zanah R Dengthuama Indoor Stadium, Mualpuiah tan a ni dawn a, a hawnnaa khuallian turin health minister Pu Lal Thanzara beisei a ni. September 3 thleng tel tum tan LPS Office-ah Rs 10-in entry form pakhat zel a lak theih. August 31 thlengin form 550 chuang pek chhuah tawh a ni a, 280 chuangin an theh lut tawh.
September 6-ah Ramhlun Boxing Hall-ah tel turte inbuka medical test neih tur a ni a, hriat tur pawimawh inhrilh nghal a ni ang. Kum 17 atanga 40 inkar a duh apiang tan tel theih a ni. A vawi khat nan hmeichhia an tel dawn a, mipa weight awm sa panga nen a tum khat nan weight pariatah title an inchuh ang. Chutih laiin weight tinah boxer pariat tal an tel tur a ni a, pariat tlin lohna weight a awm a nih chuan inelna buatsaih a ni lo ang.
WEIGHT :- 8 Mipa (5) lightfly (kg 48-52), bantam (kg 53-57), light (kg 58-64), middle (kg 65-74), lightheavy (kg 75 chung lam a duh apiang) Champion lai - NT Lalbiakkima (lightfly), HC Lalramfela (bantam), Lalmuanpuia (light), Johnkenty Vanhlimpuia (middle), PC Lalmuankima (lightheavy) Hmeichhia (3) fly (kg 48-51), light (kg 56-60), middle (kg 69-75) * A vawi khat nan hmeichhia an tel dawn a, Olympic weight pathumah title hmasa ber an inchuh ang.
LAWMMAN :- A vaiin Rs 4,72,000 sem chhuah a ni ang Mipa Champion - Rs 40,000, kawnghren leh certificate Tite fight-a chak lo : Rs 10,000 leh certificate Title fight tur zawnna final-a chak lo : Rs 8,000 Semifinalist : Rs 4,000 Quarterfinalist : Rs 2,000 * Mipa weight pangaah lawmman pawisa fai Rs 3,70,000 sem chhuah a ni ang Hmeichhia Champion - Rs 20,000, trophy leh certificate Pahnihna : Rs 10,000 leh certificate Semifinalist : Rs 2,000 * Hmeichhia weight pathumah lawmman pawisa fai Rs 1,02,000 sem chhuah a ni ang.