​A zawnin Ronaldo-a’n game nga chhung goal a khung; Juventus a chakpui

02nd December 2018, 03:12PM

Serie A inkhelah Italian heavywweight Juventus inlanin, Stadio Artemio Franchi-ah Fiorentina an luhkhunga, Juventus hi si thum faiin khual mualah an chak.

Juventus tan hian Rodrigo Bentancur chuan 31mins-ah goal hmasa ber a khunga, 69mins-ah captain Giorgio Chiellini chuan Juve goal hnihna thun ve lehin, 79mins-ah Cristiano Ronaldo chuan penalty spot atangin a khunga, Turin club hi si thum faiin an chak ta a ni.

Juventus hi tun Serie A season kal mekah hneh loh an la tawng lova, tun nipuia an lakluh; mi tam takin khawvela footballer thiam ber leh tha bera an ngaih Ronaldo chuan a zawnin game nga chhung goal a khung tawh bawk a, Juve hi an inseng thlawn dawn lo tih a lang mek.

Goal hmasa berah hian Bentancur leh Paulo Dybala –te chu an in one-two nalh hle a, hemi hnu hian penalty box chhung atangin Bentancur hian hniam teah petin, goal-ah a lut. Second half-ah Fiorentina-in bul an tan tha a, mahse goal hmaah an hriam tawk lo. Marco Benassi leh Vitor Hugo-te chuan chance tha tak tak an hlah ve ve a, Juve goalkeeper Wojciech Szczesny chuan Federico Chiesa half-volley chu tha takin a save bawk.

Fiorentina hi hlauhawm hman viau mahse, Juve captain Cheillini chuan goal a thun belha, mual neitu lam beiseina a thamral titih. Chiellini-a goal luh dan hi a ho angreng hle a, Chiellini-a ball pet chu Fiorentina goalkeeper Alban Lafont chuan lo khawih mahse, a vir let chu goal-ah a lut. Chiellini-a goal luh atanga minute sawm a ralin Ronaldo chuan penalty box atangin goal a khung ve leh a, Serie A season kal mekah goal sawm khung tawhin Genoa player Krzysztof Piatek nen top scorer an ni mek.

Juventus hian khelh 14-ah vawi khat an tumpui an inhnehtawkpui tih loh chu an la chak veka, point 40 hlawhchhuak tawhin Serie A hmahruaitu an ni a, an fal hle. Fiorentina erawh khelh 14 atangin point 18 an hlawhchhuak ve tawh thunga, 12-naah an awm a ni.

Copyright © inkhel.com 2024. All rights reserved.