UEFA Champions League round of 16 first leg inkhelah Manchester City chuan German club Borussia Monchengladbach an tlawha, City hian si hnih faiin hnehna an chang.
City tan hian Bernardo Silva leh Gabriel Jesus-te chuan goal an khunga, City hian ti hian competition zawng zawngah a zawnin vawi 19 hnehna an channa a ni.
He inkhel hi Gladbach home-a khelh tur ni mahse COVID-19 chungchanga German sawrkar dan a khirh avangin, City tan Germany-a zin a rem lova, Hungary khawpui Budapest-a Puskas Arena-ah first leg hi khelh a ni.
Borussia Monchengladbach 0-2 Manchester City
(Silva 29’, Jesus 65’)
Player Ratings
Borussia Mönchengladbach: Sommer 6, Elvedi 6, Ginter 6, Bensebaini 7, Lainer 6, Zakaria 6, Neuhaus 5, Kramer 5, Hofmann 5, Pléa 5, Stindl 5. Subs: Embolo 6, Thuram 6, Wolf 6.
Manchester City: Ederson 7, Walker 6, Dias 6, Laporte 6, Cancelo 9, Rodri 7, Gundogan 8, Bernardo 8, Sterling 7, Foden 7, Jesus 7. Subs: Mahrez 6, Torres 6, Aguero 6.
City goal hmasa zawk hi darkar chanve khelh a nih hma chiaha lut a ni a, Portuguese fullback Joao Cancelo chuan veilam atangin a cut luh hnuah ball hi Gladbach goal lamah a cross a, Portuguese player dang Silva chuan goal-ah lo khungin City hma a hruaipui.
A tir atangin City hian inkhel an thununa, chak phu zawk pawh niin, Gladbach hian chak thei hmel pawh an pu lo tih theih a ni.
Second half tir lamah Gladbach ball inpek sual avangin City hian box chhungah chance tha zet nei mahse an muanchan deuh avangin Gladbach defence lamin an chimbuai leh hmana, eng mah lovah an chhuah.
65mins-ah City hian goal an khung belh ta nge nge a, chance siam chhuaktu hi Cancelo bawk niin, Cancelo hian Silva tan ball a cross a, Silva hian Jesus-a tan ball lo tauh rem ve lehin, Brazilian striker hian goal-ah a khunga, 2-0 in City in hma an hruai.
Gladbach lam hian Rodri-a pass sual hmangin hun tawp tep tawhah chance an neia, mahse Wolf-a shot chu Ederson chuan a lo save tha viaua, 2-0 hian inkhel a tawp. City hian Champions League away inkhelah tun season-ah goal an la chhuah lo tluang zel a ni.
