24 May 2015 11:28

digimalt

​A zawna kum 4 Serie A champion ni thei Juventus

2014-15 Serie A Champions Juventus chu nizan khan tun season-a home match hnuhnung berah Scudetto hlan an ni. Juventus hian May ni 31-ah Verona an la hmachhawn dawn a, nizan kha Juventus Stadium-a an match hnuhnung ber a nih avangin trophy hlan an ni ta a ni.

2011-12 atang khan a zawnin vawi 4 ngawt Juventus hian Serie A title an la ta a, record ropui tak an hnutchhiah mek. Juve hian kar hmasa tir lamah khan Coppa Italia Final-ah 2-1 a Lazio hnehin an champion a, Domestic cup leh league title chu an la ta phawt a, June ni 6, 2015 hian Berlin-ah Barcelona nen Champions League final an khel dawn. Juventus hian treble theihna chance tha tak an nei mek a ni.

Juventus hian an home match hnuhnung berah Napoli 3-1 in an hneh a, Juventus tan Pereyra, Sturaro leh Pepe ten goal an khung a, Napoli tan Lopez Silva chuan goal khat a khung a ni. Napoli hian Champions League khelh tum hle mahse an beiseina a thamral mek a, thawhtan zan hian Roma leh Lazio te an inkhel dawn a, pathumna ni mek Lazio hian point khat an hmuh chuan Napoli tan beisei a bo chhunzawm nghal dawn tihna a ni.

Juventus tan Pogba chu season tawp lamah a rawn comback leh thei a, Champions League title la turin tunah hian dinhmun tha takah an ding mek. Barcelona chuan La Liga season nizan khan Cup chawi chungin an khel zova, Copa del Rey final chiah Champions League final an khelh hmain khelh tur an nei.

He match-ah hian chak ngei tumin Barcelona chuan an player tha ber ber an thawh chhuak dawn, chutih laiin Champions League final hmain Juventus hian match hautak tak hmachhawn tur an nei tawh dawn lo. An player tha te an chawlh tir thei tawh ang. Fixture awm danah chuan Juventus tan hamthatna a tam zawk deuh niin a lang.

Nizan Serie A match pakhat zawkah Genoa chuan 3-2 in Inter Milan an hneh a, Inter Milan chu Top 10 ah an inham tang hram hram dawn niin a lang. Serie A ah hian Cagliari, Cesena leh Parma te chu an relegate chiang tawh a, Champions League khel turin Roma an tling chiang tawh a, chutih laiin pathumna Lazio erawhin point khat chiah an mamawh tawh a ni.