Premier League inkhelah champion tawh Liverpool chuan Anfield-ah Burnley an lo mikhuala, team hnih te hi 1-1 a inhnehtawkin, tun season-ah Liverpool chuan a vawi khat nan home-ah point an hloh.

Liverpool hi a zawnin game 24 chhung ngawt Anfield-ah chak tawh mahse, Sean Dyche leh a naute chuan an kaltluang lai an tihtawp saka, Burnley hian kumin January ni 19 hnuah Premier League game 13 khel tawhin, vawi khat chiah an la tlawm.

He inkhelah hian Liverpool tan Scotland captain Andy Robertson chuan goal a khunga, Burnley tan English forward Jay Rodriguez chuan goal a khung ve bawk.

Khelh 35-ah Liverpool hian point 93 hlawhchhuak tawhin, an khelh hmabakah hnehna an chan vek theih chuan point 102 neiin season an khar ang. Burnley hian khelh 35-ah point 50 hlawhchhuak tawhin, 9-naah an awm mek thung.

Liverpool hian inkhel an thunun tluana, chance pawh ngah mahse Burnley aiin goal an khung tam thei bik lo. First half-ah Liverpool hian hma an hruaia, Robertson-a ball tauh luh hmangin Liverpool hian goal an khung.

Burnley goalkeeper Nick Pope a khel tha hle a, Burnley-in point khat an hlawhchhuahna kawngah a thawhhlawk hle. Liverpool hian second half-ah pawh inkhel thununin, Roberto Firmino chuan si ban pet per bawk mahse, Rodriguez chuan freekick atangin goal mawi tak a khung.

Robertson-a penalty hlawhchhuah ngei tura ngaih chu VAR lamin an pe lova, hun tawp hnaih lamah Burnley hian goal ruak deuh thawhah crossbar pet perin, Liverpool hi an chak lo teuh hle bawk.

Liverpool 1-1 Burnley

(Robertson 34’) (Rodriguez 69’)

Player Ratings

LIVERPOOL: Alisson 6, Williams 7, Gomez 7, Van Dijk 7, Robertson 8, Fabinho 8, Wijnaldum 7, Jones 7, Firmino 7, Mane 7, Salah 7. Subs: Alexander-Arnold 7, Keita 6, Oxlade Chamberlain n/a.

BURNLEY: Pope 9, Bardsley 7, Tarkowski 8, Long 8, Taylor 7, Pieters 6, Brownhill 6, Westwood 7, McNeil 7, Rodriguez 7, Wood 6. Subs: Gudmundsson 7, Vydra 6.