02 Aug 2020 12:51

bakteaJr.

Mizo tlangval

​A vawi 14 nan FA Cup-ah Arsenal an champion

Wembley stadium-ah mipui awm lovin FA Cup final khelh a ni a, London derby niin, Arsenal chuan Chelsea chu 2-1 in an hneha an champion.

Arsenal hi ti hian FA Cup-ah vawi 14 an champion ta a, FA Cup-ah anni aia hlawhtling hi an awm meuh lo. Arsenal manager Mikel Arteta chuan nikum kum tawp khan Arsenal enkawl tan chuahin, a season hmasa berah Gunners chu trophy a chawipui nghal.

Arsenal hi an captain Pierre-Emerick Aubameyang-a goal hnih hmangin Chelsea lakah hian an chaka, tun season-ah goal 29 a khung. Premier League lamah Europa League khel tur pawha an inpet tlin zawh loh laiin, FA Cup-a an champion avangin season tharah Europa League an khel thei hlauh dawn.

Chelsea hian inkhel bul an tan tha a, inkhel tan tir lamah American player Christian Pulisic chuan Chelsea hma a hruaipui nghala, American player FA Cup final-a goal khung thei hmasa ber a ni.

Drinks break hma deuh atangin Arsenal an khel tha chho a, Chelsea an press na viau bawk. Chelsea vanneih zan a ni lova, an captain Cesar Azpilicueta chuan Arsenal captain Aubameyang chu an box chhungah pawt thlu in, Chelsea in penalty an chawi.

Penalty atang hian Aubameyang chuan tihsual nei hauh lovin a pet goal a, Chelsea si ban nghak tu Willy Caballero a bum chiang hle. Chelsea captain Azpilicueta hi inhliam zuiin, a khel chhunzawm thei lova, loh theih lova lakchhuah niin a aiah Andreas Christensen dah luh a ni.

1-1 in first half a tawpa, second half tir teah Chelsea player pawimawh bera sawi ngam Pulisic a inhliam ve leha, lak chhuah niin a aiah Pedro luh tir a ni. Second half –ah Chelsea hian goal dang chhuahin, an defence a that tawk loh zia a lang chiang hle a tih theih awm e. Arsenal hian Chelsea nawrin, Antonio Rudiger chu awlsam taka paltlang niin, Chelsea tlarhnung a awl a, Christensen-a’n theihtawp chhuah mahse Arsenal attack an dang zo lova, Aubameyang chuan box chhung atangin mawi takin Chelsea goalkeeper chip khumin, Arsenal goal hnihna a khung.

Chelsea vanduai a kaltluanga, yellow card hmu tawh sa Matteo Kovacic chu 73mins-ah hnawhchhuah a ni a, Kovacic-a yellow card vawi hnihna hmuh dan hian sawi a hlawh nghal hle a, mi tam tak chuan inhnawhchhuahna thamah an ngai lo. Chelsea tan tihtheih a tlem hle a, inkhelah goal luh belh tawh lovin, Arsenal hian 2-1 in hnehna an chang ta a ni.

Arsenal hi FA Cup final an luh hnuhnung 7-ah an la champion veka, Chelsea hi FA Cup final an luh hnuhnung 3-ah tlawm vekin, hengah hian Arsenal lakah vek an tlawm.

Arsenal 2-1 Chelsea

(Aubameyang 28’pen, 67’) (Pulisic 5’)

Player Ratings

Arsenal: Martinez 7, Holding 7, David Luiz 7, Tierney 7, Bellerin 7, Xhaka 8, Ceballos 8, Maitland-Niles 8, Pepe 6, Lacazette 6, Aubameyang 8... Subs: Sokratis N/A, Nketiah 6

Chelsea: Caballero 6, James 6, Azpilicueta 5, Zouma 6, Rudiger 6, Alonso 6, Jorginho 6, Kovacic 5, Mount 7, Giroud 6, Pulisic 8... Subs: Christensen 6, Barkley 6, Hudson-Odoi 6, Pedro 6, Abraham 6.