11 Oct 2020 10:38

bakteaJr.

Mizo tlangval

A vawi 13 nan Nadal-a’n French Open a la

‘King of Clay’ Rafael Nadal chu a ropui zual zela, French Open final khelh zawh takah Novak Djokovic chu awlsam taka hnehin a champion.

Nadal hi a vawi 13 nan French Open-ah a champion a, ani aia French Open-a champion hnem zawk an awm lo. Nadal hian a Grand Slam title 20 a la ta chiaha, Roger Federer nen an Grand Slam title lak zat inangin, an pahnih hian Grand Slam title la hnem ber an ni.

Kum 34 mi second seed Nadal hian final inkhelah world no.1 kum 33 mi Novak Djokovic chu 6-0, 6-2, 7-5 in a sawpa, tournament chhung zawngin set khat pawh hloh lovin a champion.

Nadal hian bul a tan tha hle a, game hloh miah lovin set khatna a la a, set hnihnaah game hnih chiah a hloh bawka, tihsual a neih khat hle.

Djokovic-a’n Nadal a hneh lo hle a, Nadal-a’n tihsual (unforced error) a neih mang loh laiin, Djokovic erawh a tihsual nasa hle. Set khatnaah hian Djokovic hian unforced error 13 a neih laiin, Nadal hian 2 chiah a neia, set hnihna a zawhin Djokovic hian unforced error 30 a neih tawh laiin Nadal hian 13 bak a nei lo.

Nadal a khel tha tluana, Djokovic a insiamrem thei lo a ni bera, Djokovic hian a hmanraw neih that ber drop shot hman tum thin mahse, a hlawhtling lo fo.

Djokovic hian tum dang ang bawkin tun tournament-ah hian a drop shot a hmang tangkai leh hlea, a chakna hnar pakhat ni mahse, Nadal-a lakah erawh a point hloh phahna a ni fo a, kawng engkimah Nadal a pha lo.

Djokovic hi set thumnaah a rawn insiamtha tana, Nadal hi han break sak ve bawk mahse, a tawpah erawh Nadal hian Clay Lalpa a nihzia a lan tir a, darkar 2 leh minute 41 chhung Djokovic hi a hneha, beisei aiin an khel rei lo.

Nadal hian ti hian Roland Garros-ah hnehna vawi 100 a chang ta chiah bawka, Roland Garros bikah singles inkhelah hnehna vawi 100 chang thei awmchhun a ni.

Nadal chuan a champion hnuin, “He hmuna champion hi ka tan chuan engkim a ni a, dik tak chuan ka Grand Slam 20-na leh Roger nihrual lam ka rilruah a awm lova, ka tan chuan Roland Garros-a champion a ni tawp.

“Ka career-a hun pawimawh tak takte he hmunah hian ka lo hmang tawha, he hmuna inkhelh hian min ti phur thar renga, a khawpui hi ka ngainaa, he court hi ka theihnghilh tawh ngai lovang, “ a ti.

Djokovic chuan, “Vawiin hian King of Clay i nihzia i lan tir a, ka tisa ngeiin ka tawng ve ta a ni,” a ti ve bawk.

Sawi tawh angin Nadal hian Grand Slam title 20 a la tling ve taa, Australian Open pakhat (2009), Wimbledon pahnih (2008, 2010), US Open pali (2010, 2013, 2017, 2019) leh French open 13 (2005, 2006, 2007, 2008, 2010, 2011, 2012, 2013, 2014, 2017, 2018, 2019, 2020) te a la tawh a ni.