Tottenham striker Harry Kane chuan coronavirus avanga season khailak mek chu khelh zawh ngei tha a tih rualin, a inpawh fan lutuk ai chuan season chu tihtawp mai tha a tih thu a sawi tel.

Tunah hian Premier League hi April thla ni 30 thleng an titawp lai lawk riha, tum dan chuan May thla laihawl velah tal season hi chhunzawm tum a ni.

Season hi tum angin an chhunzawm thei dawn em a hriat lova, Europe-a COVID-19 darh dan en chuan May thla hian inkhelh theih a nih a la rinawm loh hle a, season kal zel dan turah eng mah chiang a awm lo.

England captain Kane chuan, “Premier League hian season khelh zawh a nih ngei theih nan theihtawp an chhuah dawn tih ka hria a, mahse a inpawh fan lutuk dawn chuan tawp chin a awm a ngaia, kei pawhin season khelh zawh tum ngei chu tha ti mah ila, a lutuk chin a awmin ka hria.

“Season hi khelh zawh theih loh a ni maitheia, July thla leh August thla vel thleng season hi pawh fana season thar awm tur tawlh tir hi keichuan a hlawkna leh a thatna em em ka hre ve lo. Rorel tute’n engtin tak nge hma an lak ka hre lova, mahse sum lamah club thenkhat te’n an hlawkpui em em dawn lo.

“Player thlirna tlang atang chuan season zawh tum hi a tha bera, mahse sawi tawh angin a lutuk chin a awma, ka tan chuan June thlaah pawh kan la tan thei lo fo a nih chuan season tihtawp mai a tha ka ti.

“June thla tawpah pawh season kan la zo lo a nih chuan tih theih dang kan zawn mai a, season thar atan inbuatsaih mai a tha zawka, a nih loh chuan nakkum lam thlengin kan tawlh anga engkim a buai dawn. Euro a buai tel anga, chumi a buai chuan a kum leha World Cup awm tur a nghawng tawh dawn a ni,” a ti.