English driver Lewis Hamilton chuan a Formula One world championship pangana a la teuh tawh hle a, tun Sunday-a Mexican Grand Prix-ah top 7-a a lan theih phawt chuan tun season champion a ni dawn a, a world championship pangana a ni dawn bawk.

Hamilton hi a tlan thei a nih phawt chuan top 7-a a awm ngei pawh a rinawm hle a, July thla atang khan pasarihna ai hniamah a la awm lo. Mercedes driver hian a zawnin vawihnih world champion nih theihna hun a nei meka, amah hnaih ber tu hi Ferrari driver Sebastian Vettel a ni.

Hamilton chuan championship pali la tawh mahse, kumin chu a tana a hlut ber tur thu sawiin, “Championship lak hi ka thil tum ber a ni thin a,ka vawikhat lakna kha ka la hre reng nghe nghe. Champion tawhte sawi dan chuan championship lak nawn chu a har telh telh thu an sawi a, a dik reng bawk. Pakhat lak pawh kha a harsa em em a, a har telh telh reng bawk.”

“Mahniin hma sawn zel mah ila, inelna a sangin a har telh telh ve zel a ni. Harsatna dang a rawn awm a, chuvang chuan ka tan chuan kumin hi a la harsa bera, title hi ka lo la ngai a nih chuan harsa ka tih ber leh ka hlut ber a ni ang,” a ti.

Hamilton hi F1 driver awm tawh zinga tha ber leh thiam ber zinga ngaih a ni a, tun Sunday hian a champion leh a nih phei chuan F1 world champion vawi nga ni thei mi tlemte zinga mi a ni dawn a ni.